بادغیس کې سیمه ییز طالب چارواکي وايي، د دې ولایت آب کمري ولسوالۍ کې د «کرنیزو زهرو» خوړولو وروسته یوه ماشوم ژوند له لاسه ورکړی او یو بل ماشوم مسموم شوی دی.
رخشانه: بادغیس کې د طالبانو د والي ویاند رحیم الدین رحیمي ځايي رسنیو ته ویلي، دا پېښه پرون (جمعه د زمري ۳۰ مه) د آب کمري ولسوالۍ «آقازي» سیمه کې رامنځ ته شوې ده.
د رحیمي په وینا، دې ماشومانو «کرنیز زهر» چې د کرنیزو محصولاتو د حشراتو د وژلو لپاره کارول کېږي، خوړلې، چې په ترڅ کې یې یو مړ شوی او بل مسموم شوی دی.
مسموم شوی ماشوم د درملنې لپاره د بادغیس ولایتي روغتون ته وړل شوی او روغتیايي وضعیت یې د ډاډ وړ ښودل شوی دی.
بادغیس کې د طالبانو د والي ویاند وايي، دا دواړه ماشومان نجونې او کابو څلور کلنې او سره خویندې وې.
د کرنیزو زهرو خوړولو له امله د ژوند له لاسه ورکول، په هېواد کې یو له نادرو پېښو څخه دي.
کرونده ګر کرنیز زهر د کرنیزو آفتونو سره د مبارزې او د مضرو حشراتو د وژنې لپاره کاروي.
