سرپل کې یوې ځايي سرچینې ویلي، د دې ولایت سوزمه قلعه ولسوالۍ کې د طالبانو یوه غړي، خپله دویمه مېرمن په ډزو وژلې ده.
رخشانه: د دې ښځې یو له خپلوانو رخشانې رسنۍ ته ویلي، چې هغه د جمعې په ورځ د (زمري ۳۰ مه) د سوزمه قلعه ولسوالۍ په «کتنه قلعه» کلي کې رامنځ ته شوې ده.
د سرچینې په وینا، دا ښځه کابو دوه میاشتې وړاندې د حسین په نوم د سرپل ولایت د ګوسفندې ولسوالۍ اصلي اوسېدونکي تښتولې او په زور یې له هغه سره «جبري واده» کړی دی.
سرچینې زیاته کړې، د طالبانو دې غړي خپل مېرمن له «لفظي شخړې» وروسته په مرمۍ ویشتلې او وژلې یې ده.
د سرچینې په وینا، دا ښځه د «شا له خوا» په مرمۍ ویشتل شوې ده.
سرچینه ادعا کوي، چې د طالبانو دا غړی سرپل کې د یوه بل ځوان سړي او یوې زړې ښځې په وژلو هم تورن دی.
رخشانه رسنۍ په خپلواکه توګه د طالبانو د دې غړي له خوا د دوه نورو وژنو د ادعا پخلی نه شي کولی.
تر اوسه سرپل کې ځايي طالب چارواکو په دې اړه څه نه دي ویلي.
