د بښنې نړیوال سازمان آسیايي څانګې د طالبانو د پولیسو قانون توشېح ته په غبرګون کې وايي، دا سند په بشري حقونو پراخ برید دی او د عدالت پروسې، د عادلانه محکمې حق او د بیان آزادۍ لپاره جدي پایلې لري.
رخشانه: دې بنسټ نن (چهارشنبې د وږي ۴ مه) په خپله اېکس پاڼه لیکلي، د طالبانو د پولیسو قانون، خصوصي حریم او د ماشومانو حقونه تر پښو لاندې کوي.
د بښنې نړیوال سازمان ویلي، دې قانون یوه تر ټولو اندېښمنوونکې احکامو، د هر ډولو غونډو او لاریونونو په بشپړه توګه بندول دي، چې دا د سوله ییزو غونډو د آزادۍ څخه ښکاره سرغړونه ګڼل کېږي.
د دې بنسټ په وینا، دا ډول پراخ بندیز، په افغانستان کې له وړاندې د ځپلو فضا او د اساسي آزادۍ سخت محدودیت لا زیاتوي.
د بښنې نړیوال سازمان وايي، همدارنګه طالبان معترضان او خپل مخالفین د نیولو، خپل سرو زنداني کولو، ربړونې او نورو ټولو غیرانساني چلندونو او په جبري توګه د ورکولو له لارې په نښه کوي.
دې بنسټ له طالبانو غوښتي، هغه ټول فرمانونه او سیاستونه، چې په نړیوال چوکاټ کې د افغانستان له کړو ژمنو سره په ټکر کې دي لغوه کړي او هغه اقداماتو ته چې دا ژمنې ماتوي پای ورکړي.
د طالبانو مشر د روانۍ اوونۍ د شنبې په ورځ په پنځو څپرکیو او دري پنځوس مادو کې د پولیسو قانون په توشېج کولو سره په هېواد کې «هرډول لاریونونونه» بند اعلان کړل.
