د بشري حقونو فعال او افغان خبریال جهانزېب ویسا استرالیا کې د طالبانو تر واک لاندې افغان وګړو د وضعیت «Peace Up» په اړه پروګرام کې له نړیوالې ټولنې وغوښتل، چې د افغان ښځو وضعیت ته پاملرنه وکړي.
رخشانه: نوموړي دا څرګندونې نن دوشنبې د (وږي ۹ مه) استرالیا کې د ملګرو ملتونو د یو شمېر ځوانانو له خوا جوړ شوي پروګرام کې بیانکړې دي.
جهانزېب ویسا په دې پروګرام کې د طالبانو تر واک لاندې افغانستان د کړکېچن وضعیت، په ځانګړې توګه د ښځو او نجونو شرایط او د دوی په وړاندې د طالبانو له تبعیض نه ډکو محدودیتونو په اړه خبرې وکړې.
هغه په دې پروګرام کې د افغان ښځو او نجونو د وضعیت څخه د انځورونو او مطالبو یوه ټولګه نندارې ته وړاندې کړه او د طالبانو تر راتګ مخکې یې د افغان ښځو او نجونو د ژوند د واقعیتونو په اړه وینا وکړه.
ویسا په دې پروګرام کې د ښځو او نجونو په وړاندې د طالبانو پراخو محدودیتونو ته اشاره وکړه او له نړیوالې ټولنې یې وغوښتل، چې د افغان ښځو او نجونو وضعیت ته پاملرنه وکړي.
نوموړې د استرالیا پارلمان (MPs) له چارواکو او استازو، د ملګرو ملتونو د ځوانانو برخې له استازو او ټولو ټولینزو او مدني بنسټونو وغوښتل، چې د افغان وګړو په ځانګړې توګه د ښځو او نجونو اواز شي.
د بشري حقونو دې فعال د استرالیا له دولت نه وغوښتل، چې د افغان وګړو په ځانګړې توګه د ښځو او نجونو په واک کې ډېرې بشردوستانه وېزې په واک کې ورکړي.
ویسا د دې پروګرام له مسوولینو او حاضرو استازو وغوښتل، چې افغان پناه غوښتونکو ته چې په ګاونډیو هېوادونو کې دي، پاملرنه وکړي او خوندي هېوادونو ته د هغوی د لېږد زمینه برابره کاندي.
هغه همدارنګه له ټولو ګډونوالو وغوښتل، چې د افغان ښځو او نجونو تر څنګ ودرېږي او اجازه ورنه کړي، چې له زده کړو، کار، ورزش او آزادۍ څخه د هغوی محرومیت په یوه هېر شوي بحران بدل شي.
