انځور: UNFPA
افغانستان کې د ملګرو ملتونو د ښځو څانګې (UN Women) ویلي، افغان مرستندیه ښځې باید وکولی شي په خوندي او تګ راتګ او ځای پر ځای کېدو کې له محدودیت پرته کار وکړي.
رخشانه: دې بنسټ نن (چهارشنبې د وږي ۱۱ مه) په خپله اېکس پاڼه، د ښځینه مرستندویانو پر کار او تګ راتګ د طالبانو د بندیزونو د لرې کولو غوښتنه کړې ده.
د دې سازمان د ښځو څانګې لیکلي دي، افغانستان کې د ښځو او نجونو لپاره د مرستو رسولو یوازېنۍ لار همدا ښځینه مرستندویانې دي.
د دې بنسټ په وینا، مرستندویه افغان ښځې، د ښځو او نجونو لپاره حیاتي معلومات، ملاتړ او اړین خدمات برابروي.
ملګرو ملتونو ټینګار کړی، چې افغان ښځینه مرستندویانې باید وکولی شي، په خوندي او په تګ راتګ او ځای پر ځای کېدو له محدودیت پرته کار وکړي.
دې بنسټ له افغان ښځو او نجونو د ملاتړ غوښتنه کړې ده.
کابو یو کال کېږي، چې د ملګرو ملتونو ښځینه کارکوونکي په دې سازمان پورې تړلې بنسټونو دفترونو ته له لاسرسي محرومې شوې دي.
دا مهال ښځینه مرستندویانې د سفر او خپلې دندې ته د تګ پر مهال اړ دي، چې شرعي محرم ولري.
د ملګرو ملتونو د ښځو څانګې (UN Women)پرون اعلان وکړ، چې افغانستان کې له هرو ۱۰ ښځو ۷ هغه یې له ناوړه رواني وضعیت سره مخ دي.
دې بنسټ لیکلي وو، چې له زده کړو، کار او په عمومي ژوند کې د ګډون د کلونو محرومیت، د افغان ښځو او نجونو په رواني روغتیا ژورې اغېزې کړې دي.
