د روان کال د وږي میاشتې په وږی د دوشنبې په ورځ شکیلا اقبالي له خپل یوه ورور سره د خپلي استوګنې له کلي د داینکډي میرامور ولسوالۍ ته روانه شوه، تر څو د خپل طلاق د قضیې په اړه د محکمې وروستۍ تر لاسه کړي.
خو د سرچینې په وینا، د رحمت الله عسکري په نوم د شکیلا مېړه، په لار کې کمین ورته نیولی و او په شکیلا یې د تومانچې برید وکړ او هغه یې و وژله.
د شکیلا یو نېږدې خپلوان چې نه یې غوښتل هویت یې څرګند شي، رخشانې رسنۍ ته و ویل، د شکیلا خاوند په بې رحمه ډول هغه درې مرمۍ په دې سترګو و ویشته او شکیلا ځای پر ځای ژوند له لاسه ورکړ.
هغه و ویل: «دوی سهار شپږ بجې د ولسوالۍ په لور وخوځېدل، ځکه یوه ورځ مخکې محکمې له دوی غوښتي وو، چې د دوشنبې به سهار ورشي. کله چې نیمايي لارې ته رسېږي، رحمت الله چې د تېږې تر شا ورته پټ وو، د شکیلا په سترګو یې درې ډزه وکړل او هغه مظلومه یې و وژله.»
د سرچینې له قوله، وروسته چې رحمت الله په خپل موټر کې له سیمې تېښته کوي، د شکیلا ورور ژر میرامور ولسوالۍ کې د طالبانو له امنیه قوماندانۍ سره اړیکه نیسي او د دې پېښې راپور ورکوي.
سرچینې زیاته کړه: «ورور یې ژر له قوماندنۍ سره اړیکه نیولې وه او هغوی یې په جریان کې اچولي وو، د قاتل موټر په نیمه لار کې خرابېږي او پولیس هغه نیسي. هغه [رحمت الله] اقرار کوي، چې مېرمن یې په خپله وژلې ده.»
د سرچینې په خبره، قاتل اوس د دایکنډي ولایت د میرامور ولسوالۍ په زندان کې بند دی.
هغه اسناد او شواهد چې د رخشانې رسنۍ په واک کې ورکړل شوي ښيي، چې شکيلا په بې رحمه ډول د لارې په اوږدو کې وژل شوې ده.
هغې له څلور میاشتې مخکې نه د خپل مېړه په وړاندې میرامور ولسوالۍ کې د طالبانو په محکمه کې حقوقي دعوا پرانستې وه او له خپل مېړه یې د طلاق غوښتنه کړې وه. شکيلا په دې موده کې د خپل پلار په کور کې ژوند کاوه.
د هغې د عریضې په پاڼه کې راغلي، چې مېړه یې رحمت الله عسکري، د امریکا دایمي وزیزه لري او کابو شپږ میاشتې وړاندې، کله چې له امریکا دایکنډي ته بېرته راغی، شکیلا یې وهلې ډبولې او هغه یې په مرګ ګواښلې وه.
په عریضه کې راغلي دي: «زما یاد شوی مېړه، له څو کلونو تېرولو وروسته له امریکا څخه بېرته راستون شوی او په ما یې عریضه کړې او زه یې په وسله وګواښلم.»
شکیلا په محکمه کې په شکایت کولو، د مېړه له کورنۍ د خپل مهر او خپلو شخصي توکو غوښتونکې وه.
شکیلا ۲۷ کاله عمر درلود او له هغې دوه زامن پنځه او اووه کلن پاتې دي. هغې په ۱۳۹۶ کې، شاوخوا ۹ کاله وړاندې له رحمت الله عسکري سره واده وکړ.
سرچینه وايي، د شکیلا اقبالي د قتل په قضیه کې، میرامور ولسوالۍ کې د طالبانو د محکمې چارواکي هم لاس لري.
هغه و ویل: «شکیلا له خپل ورور سره یو ځای د وږی اوله د یکشنبې په ورځ محکمې ته ورغلې او ټاکل شوې وه، چې د مهر او طلاق قضیه په همغه ورځ فیصله شي. خو د [شکیلا د خاوند] رحمت الله پلار اکبرخان له محکمې یوه بله ورځ وخت هم غوښتی و تر څو وتوانېږي سلا مشورې وکړي. محکمې شکیلا ته ویلي وو، سبا دوشنبې سهار وختي راشه، چې قضیه د فیصله کړو، خو د دې مشورې پایله یې د شکیلا وژل کېدل وو.»
د شکیلا کورنۍ د طالبانو له عدلي او قضايي بنسټ نه د خپلې لور د وژل کېدو په اړه د عدالت غوښتنه کوي. سرچینه وايي، د شکیلا د کورنۍ غړو د طالبانو له محکمې غوښتي، چې قاتل باید قصاص کړای شي.
سرچینې ویلي، د رحمت الله کورنۍ په وار وار شکیلا او د هغې کورنۍ په مرګ ګواښلې وې او میرامور ولسوالۍ کې ځايي طالب چارواکو هم دا قضیه جدي ونه څېړله.
رخشانه رسنۍ ونه توانېده، چې د دایکنډي میرامور ولسوالۍ کې د ځايي طالب چارواکو او همدارنګه د رحمت الله د کورنۍ سره په دې اړه خبرې اترې وکړي.
