خوست کې ځايي طالب چارواکو ویلي، د دې ولایت «علي شېر او تریزې» ولسوالۍ کې د ناچاودو توکو د چاودنې له امله یو ۱۵ کلن هلک وژل شوی او دوه ماشومې نجونې ټپیانې شوې دي.
رخشانه: خوست کې د طالبانو د امنیه قوماندانۍ ویاند طاهر احرار وايي، دا پېښه نن (سه شنبې د وږي ۲۴ مه) د «علي شېر او تریزي» ولسوالۍ په «دولتي نمرو» کې رامنځ ته شوې ده.
د دې ناچاودو توکو د چاودنې د نوعیت او څرګندوني په اړه معلومات په لاس کې نشته.
د یوې ټپي ماشوم روغتیايي حالت نازک ښودلی شوی دی.
سره له دې، چې کلونه کلونه د ماین پاکۍ بنسټونو په ماینونو د لړلو سیمو پاکولو هڅې کړې، خو لا هم د هېواد په ځينو ولایتونو کې داسې سیمې شته، چې ماینونه او ناچاودي توکي په کې شته.
هر کال هېواد کې لسګونه کسان له جګړو د پاتې شویو ناچاودو توکو او ماینونو د چاودنو له امله ژوند له لاسه ورکوي.
د شمېرو له مخې، دا مهال په هېواد کې شاوخوا درې میلیونه او ۳۰۰ زره کسان، په ماینونو او ناچاودو توکو لړلو سیمو په یوه کیلومترۍ کې ژوند کوي.
