لوګر کې ځايي طالب چارواکي وايي، د دې ولایت مرکز پل علم ښار کې د یوې ښځې او درې ماشومانو په ګډون د یوې کورنۍ څلور غړي د نامعلوم دلیل له امله مسموم شوي دي.
رخشانه: لوګر کې د طالبانو د والي ویاند میرویس ابدالي وايي، دا پېښه د جمعې په شپه (د وږي ۲۷ مه) د ولایت د مرکز پل علم ښار د کډوالو په ښارګوتي کې رامنځ ته شوې ده.
د ابدالي په وینا، د یوې ښځې او دریو ماشومانو په ګډون د یوې کورنۍ څلور غړي په نامعلوم دلیل مسموم شوي دي.
هغه زیاته کړې، د دې پېښې په ترڅ کې د دې کورنۍ مور ژوند له لاسه ورکړی او دوه لونې او یو زوی یې مسموم شوي دي.
لوګر کې د طالبانو د والي ویاند وايي، د مسموم شویو ماشومانو روغتیايي وضعیت خراب وو او د درملنې لپاره کابل ته ولېږدول شول.
تر اوسه د دې پېښې علت نه دی څرګند او د طالبانو امنیتي ځواکونو په دې اړه خپلې پلټنې پیل کړې دي.
له بل لوري د پل علم د کډوالو په ښارګوتي کې سرچینې وايي، ګمان کېږي، چې مسموموونکي مواده د دې کورنۍ ډوډۍ ته اچول شوي وي. دا ادعا د طالبانو له خوا نه ده تایید شوې.
لوګر کې ځايي طالب چارواکو ویلي دي، د دې پېښې د اصلي علت معلومولو لپاره د دوی څېړنې دوام لري.
