د ملګرو ملتونو د ښځو څانګې اجرائیه مدیرې سیما باهوس د یوناما له نوې مشرې او د افغانستان لپاره د ملګرو ملتونو د سرمنشي له ځانګړې استازې رباب فاطمه، څخه د افغان ښځو له حقونو د ملاتړ لپاره د همکارۍ غوښتنه وکړه.
رخشانه: باهوس نن (شنبې د وږي ۲۸مه، په خپله اېکس پاڼه د یوناما د نوې مشرې او ملګرو ملتونو د سرمشني د ځانګړې استازې په توګه، د رباب فاطمه له ټاکل کېدو هرکلی وکړ.
هغې لیکلي: «په دې حساس وخت کې د ټولو افغان ښځو او نجونو د حقونو، غږ او د مشرۍ رول د ملاتر لپاره، د هغې ګډې همکارۍ ته سترګې په لار یو.»
د یوناما نوې مشرې او د افغانستان لپاره د ملګرو ملتونو د سرمنشي ځانګړې استازې رباب فاطمه هم د سیما باهوس د پوسټ په بیا خپرولو سره، په خپله اېکس پاڼه د همکارۍ لپاره د چمتوالي اعلان کړی دی.
افغانستان کې د یوناما نوې مشرې لیکلي دي: «له شک پرته د موږ د ښې همکارۍ د دوام لېواله یو! د تاسو له ټولو هغو هڅو چې د ښځو د پیاوړتیا لپاره هم ترسره کړې، منندوی یو!»
یوناما کابو میاشت وړاندې اعلان وکړو چې بنګله دېشۍ دیپلوماته رباب فاطمه، په افغانستان کې د ملګرو ملتونو د سرمنشي د ځانګړي استازې په توګه ټاکل شوې ده.
رباب فاطمه د قزغیزستاني دیپلوماتې روزااوتونبایوا، چې کاري موده یې د ۲۰۲۵ په سپتمبر کې پای ته ورسېده، ځای ناستې شوه.
د هغې د ماموریت له پای ته رسېدو وروسته، د یوناما سیاسي مرستیال جورجت ګانیون، په افغانستان کې د ملګرو ملتونو د سیاسي استازولۍ سرپرستي په غاړه درلوده.
