د «ښځو د آزادۍ شبکې» (FWN) غړو د سولې نړیوالې ورځې په مناسبت ویلي، رښتینې سوله، د ښځو لپاره د آزادۍ، عدالت او برابرۍ پرته امکان نه لري.
رخشانه: د دې اعتراضي غورځنګ غړو نن (دوشنبې د وږي ۳۰ مه) له افغان ښځو او نجونو د نړیوالې ټولنې د ملاتړ غوښتنه وکړه.
دوی په اعلامیه کې لیکلي دي: «تل پاتې سوله یوازې د جګړې او تاوتریخوالي په پای ته رسېدو تحقق نه مومي. بلکې آزادۍ، عدالت، برابرۍ او انساني کرامت درناوي ته اړتیا لري.»
د «ښځو د آزدۍ شبکې» غړو ویلي، افغان ښځې او نجونې لا هم د زده کړو، کار، بیان آژادۍ او په ټولنه کې د ګډون له پراخو محدودیتونو سره مخ دي.
د معترضو ښځو په وینا، «هغه سوله چې په کې د ټولنې نیمايي وګړي له خپلو اساسي حقونو محروم وي، نه شي کولی تل پاتې او عادلانه وي.»
دوی په افغانستان کې د ښوونځیو او پوهنتونو د دروازو پرانستو، د کار او اساسي خپلواکیو د حق د تضمین او د ښځو په وړاندې د تاوتریخوالي او سیستماتیک تبعیض د پای ته رسولو غوښتنه وکړه.
د ښځو د آزادۍ شبکې غړو له نړیوالې ټولنې وغوښتل، چې د افغان ښځو غږ واوري او د هغوی له حقونو او خپلواکیو ملاتړ وکړي.
