افغانستان کې د ملګرو ملتونو د سیاسي استازولۍ دفتر (یوناما) د سولې نړیوالې ورځې سره سم ویلي، تل پاتې سوله هغه وخت مانا لري، چې ښځې او نجونې د هېواد راتلونکو ټولنو په جوړېدو کې برخه ولري.
رخشانه: یوناما نن (دوشنبې د وږي ۳۰ مه) په خپله فسبوک پاڼه لیکلي، سږ کال د سولې نړیواله ورځ «د سولې لپاره پانګونه، د ټولو لپاره، په هر ځای او هره ورځ» ده.
د ملګرو ملتونو سیاسي استازولۍ ویلي «سوله د یوې ښې راتلونکې جوړولو لپاره یو فعال او شعوري غوراوی دی.»
دې بنسټ لیکلي دي: «د تل پاتې سولې موندل یوازې د جګړې د نه شتون په مانا نه دی. دا کار پر خلکو دوامداره پانګونې، زده کړو، د ګټې فرصتونو او انساني کرامت ته اړتیا لري.»
یوناما زیاته کړې، تل پاتې سوله د ګډون پر ستنه ولاړه ده او هغه مهال لا کلکوالی مومي، چې ښځې او نجونې په مانا لرونکې توګه د خپل هېواد د راتلونکو ټولنو په جوړولو کې برخه ولري.»
د ملګرو ملتونو سرمنشي انتونیو ګوترش هم په یوه بیانیه کې ویلي، « له یوې داسې نړۍ سره مخ یو چې [سوله] په کې په خطرناک ډول پیدا کېدونکې ده او ټولنې د تاوتریخوالي او اختلافاتو له امله متزلزله شوې دي.»
ګوترش زیاته کړې، په نړۍ کې جګړې د پراخېدو او پېچلي کېدو له پلوه مخ پر زیاتېدو دي، له پولو اوړي او خلکو ته پراخ کړاونه او زیانونه ور په برخه کوي.
هغه ټینګار کړیو چې داوطلبان، د سولې مدافعین، د مدني ټولنې مشران، سوله ساتي ځواکونه او سوله جوړونکي، درزونه پټوي، ټولنې متحدې کوي او د خبرو اترو لپاره هڅې کوي.
د ملګرو ملتونو سرمنشي د نړۍ له مشرانو غوښتي، چې د سوله ییزې راتلونکې لپاره پر ټولو خلکو پانګونه وکړي.
