بنګله دېش هېواد کې د «ښځو لپاره آسیايي پوهنتون» (AUW) کې د محصلینو تر منځ سرچینې وايي، دې پوهنتون تصمیم نیولی، چې شاوخوا ۱۶۰ افغان زده کړیالانې اخراج کړي.
رخشانه: یوې افغان زده کړیالې ویلي، دا پرېکړه په دې وروستیو کې د «ښځو لپاره آسیايي پوهنتون(AUW) کړې ده.
د دې زده کړیالې په وینا، دا پرېکړه وروسته له هغې شوې، چې د افغان نجونو یوې ۱۶۰ کسیزه ډلې، وروسته له هغې، چې خپلو ملاتړو ته یې یو اعتراضي برېښنالیک ولېږه، د پوهنتون له خوا په ایستلو سره وګواښل شوې.
تر اوسه معلومه نه ده، چې څو تنه زده کړیالانې به په جبري توګه افغانستان ته ولېږل شي. د سرچینې په وینا، له بنګله دېش نه د افغان زده کړیالانو د ایستلو لړۍ دوام لري.
هغې ویلي، له کال زیاده موده کېږی، هغه افغان زده کړیالان، چې د رخصتۍ په وخت کې افغانستان ته تللي، ډېری هغو یې بنګله دېش ته د بېرته تګ امکان نه درلود.
نوموړې زیاته کړې، ډېری له دې زده کړیالانو اوس حیران پاتې دي او پوهنتون د وضعیت ته د رسېدنې او وېزو د ورکړې په اړه د هغوی اېمېلونو ته ځواب نه ورکوي.
د دې زده کړیالې په وینا، یو شمېر افغان محصلینې، د کابل لوېدیځ کې د سیدالشهدا ښوونځي زده کوونکې دي.
افغان زده کړیالانو د «ښځو لپاره د آسیايي پوهنتون» د دې پرېکړې په اړه اندېښنه ښودلې وايي، افغانستان ته د ایستو په صورت کې به «قرباني» شي.
یوې افغان زده کړیالې ویلي: «که افغانستان ته وګرځو، بیا پوهنتون ته د راتګ چانس نه لرو، کلونه مو چې درس ویلی، بې ځایه ځي.»
د ښځو لپاره آسیايي پوهنتون واک ته د طالبانو له بیا راتګ وروسته له افغانستان څخه د محصلینو جذبولو ته شدت ورکړی وو. دا پوهنتون د امریکا د مرستو له بندېدو وروسته، د افغان زده کړیالانو په ایستلو پیل کړی دی.
معلومه نه ده، چې له دې پوهنتون څخه به څومره افغان زده کړیالانې و ایستل شي.
تر اوسه «د ښځو لپاره آسیايي پوهنتون» په دې اړه وضاحت او د رخشانې رسنۍ اړیکو ته یې هم ځواب نه دی ورکړی.
