د بشري حقونو په چارو کې د ملګرو ملتونو د سرمنشي مرستیال او په نیویارک کې د دې سازمان د بشري حقونو د دفتر مشر کلودیا فوینټس جولیو ویلي، د افغانستان د راتلونکې په اړه د ښځو غږ او حقونه باید د خبرو اترو اصلي محور وي.
رخشانه: جولیو پرون ناوخته (پنشنبې د تلې ۲ مه) په خپله @ پاڼه د یوه پوسټ په خپرولو سره لیکلي، چې د بشري او ښځو د حقونو د یو شمېر فعالانو سره یې لیدلي دي.
هغه په خپله اېکس پاڼه لیکلي، د افغان وګړو د بشري او ښځو د حقونو د فعالانو کیسې «الهام بښوونکې» دي.
د ملګرو ملتونو مرستیال سرمنشي، د جنسیتي توپير په وړاندې د هغوی مېړانه او هوډ ستایلی دی.
نوموړي لیکلي: «د جنسیتي توپير په وړاندې د دوی زړورتیا او هوډ هېڅ شک نه پرېږدي، چې د افغان مېرمنو حقونه او غږ باید د افغانستان د راتلونکې په اړه د ټولو بحثونو اصلي محور وي.»
طالبانو په تېرو پنځو کلونو کې د ښځو او نجونو پر وړاندې له ۱۰۰ زیات فرمانونه صادر کړي دي او د سختو او هدفي محدودیتونو په لګولو سره یې، د نیمايي وګړو حقونه له منځه وړي دي.
دې ډلې د افغان ښځو او نجونو په وړاندې د سختو او پراخو محدودیتونو لګولو سره، د جنسیتي ځپنې د نظام په بنسټیز کېدو او ټینګېدو تورن دي.
د بشري او ښځو د حقونو فعالانو په وار وار له نړیوالې ټولنې او د بشري حقونو له بنسټونو غوښتي، چې د طالبانو تر واک لاندې افغانستان کې جنسیتي توپیر په رسمیت وپېژني.
