په اروپايي هېوادونو کې د هزاره ټولنې یو شمېر فعالانو، د عبدالرحمن خان له خوا په افغانستان کې د هزاره ګانو د نسل وژنې کلیزې د یاد مرسم د هسپانیا په بارسلونا ښار کې تر سره کړل.
رخشانه: د یاد دا پروګرام پرون جمعه (د تلې ۳ مه) د ایالت کاتالونیا پارلمان د یو شمېر غړو او هزاره ټولنې د فعالانو له خوا د هسپانیا د بارسلونا ښار په آلباردا کلتوري مرکز کې جوړ شوی وو.
د هزاره ټولنې فعالانو، په دې پروګرام کې د هزاره ټولنې د تاریخي او اوسني وضعیت، قومي او مذهبي تبعیض، د ښځو او نجونو د وضعیت، پر ملکیانو د بریدونو، زده کړو، د ځمکو مصادره کولو او جبري ځای پر ځای کولو باندې خبرې اترې وکړې.
دوی و ویل: «د هزاره ګانو مسله باید یوازې په پاشلو او منفرده پېښو پورې محدوده نه وي، بلکې باید د تاوتریخوالي، تبعیض او محرومیت د اوږدې تاریخي پروسې په چوکاټ کې وڅېړل شي.»
همدارنګه د هزاره ټولنې فعالانو د هزاره ښځو د وضعیت په اړه خبرې وکړې ویې ویل، د هغوی په وړاندې تبعیض قومي، مذهبي او جنسیتي اړخونه موندلي او نړیواله ټولنه باید د هزاره ښځو او نجونو وضعیت ته ځانګړې پاملرنه وکړي.
دوی «په افغانستان کې د هزاره ګانو د نسل وژنې، دې دوسیې ته د جدي او اغېژمنې رسیدګۍ او د جنسیتي توپیر د په رسمیت پېژندنې» غوښتنه وکړه او په «افغانستان کې یې د ښځو او نجونو د حقونو پراخو او سیستماتیکو سرغړونو» ته د نړیوالې ټولنې په جدي پاملرنې ټينګار وکړ.
د هزاره ټولنې فعالانو پر کاج او شمع هدایت ښوونیزو مرکزونو د بریدونو د قربانیانو په ګډون د هزاره زده کړیالانو په وړاندې بریدونو ته په اشارې ټینګار وکړ، چې د قربانینو ملاتړ او پر ملکي وګړو د بریدونو د تکرار مخنیوی باید د نړیوالې ټولنې د اقداماتو برخه وي.
د کاتالونیا ایالت د پارلمان مرسیتالې او د اروپايي ټولنې د کمېسیون غړې، مېرمن راکل سانس ګوئرا، د هزاره ټولنې د استازو او فعالانو د حضور هرکلی وکړ او په افغانستان کې یې د بشري حقونو د وضعیت په اړه خپله اندېښنه څرګنده کړه.
هغې په دې پروګرام کې، د طالبانو تر واک لاندې افغانستان کې د بشري حقونو، په ځانګړې توګه د ښځو او نجونو او هزاره ټولنې د وضعیت په اړه اندېښنه وښوده ویې ویل: «طالبان بشري حقونو ته درناوی نه کوي او دا یو مشروع حکومت نه دی.»
ګوئرا زیاته کړه، چې د هزاره ټولنې د فعالانو له خوا مطرح شوي وړاندیزونه یې تر لاسه کړي او د بېلا بېلو پارلماني ډلو په واک کې به یې ورکړي او هڅه به وکړي، چې د پارلمان د امکاناتو او صلاحیتونو په چوکاټ کې، د دې مطالبو له تعقیب څخه ملاتړ وکړي.
د کاتالونیا ایالت د پارلمان مرستیالې همداراز د اروپا په کچه د هزاره ګانو د مسلې راپورته کولو او د «هزاره ګانو د نسل وژنې» موضوع ته د رسېدو د هڅو په اړه هم خبرې وکړې.
په دې پروګرام کې د هزاره ګانو په اړه د پارلمان د اعلامیې د تعقیبولو او په سیاسي ادارو کې د هزاره ګانو د غږ اورېدو لپاره د لا زیاتو فرصتونو رامنځ ته کولو خبرې مطرح شوې.
یاد پروګرام کې وړاندیز وشو، چې د کاتالونیا په پارلمان کې دې د هزاره ټولنې د فعالانو او استازو په شتون کې یوه عامه غونډه جوړه شي، څو د هزاره ګانو د نسل وژنې او د دې ټولنې د وضعیت په اړه د پارلمان له غړو سره نېغې خبرې وشي.
د غونډې په جریان کې د هزاره ټولنې فعالانو د کاتالونیا ایالت پارلمان ته د هزاره ټولنې د لیک بشپړه نسخه، د ځانګړو اسنادو او غوښتنو سره یو ځای وړندې کړه.
دوی په دې لیک کې «د هزاره ګانو په وړاندې د تاوتریخوالي او تبعیض اسناد د مستند کولو او څېړلو، د قربانیانو او زده کړې د حق د ملاتړ، د ځمکو مصادره کول او جبري کډوالۍ د څېړلو غوښتونکي شول.»
