د افغان د خبریالانو مرکز (AFJC) وايي، د طالبانو تر واک لاندې افغانستان کې اطلاعاتو ته د لاسرسي حق «له بې مخینې ځپلو سره مخ شوی او په عمل کې له منځه تللی دی.»
رخشانه: دې بنسټ نن (دوشنبې د تلې ۶ مه) اطلاعاتو ته د لاسرسي نړیوالې ورځې په مناسبت یوه اعلامیه کې ویلي، طالبانو په تېرو پنځو کلونو د بیان او رسنیو د آزادۍ پر وړاندې لږ تر لږه ۲۴ لارښوونې صادرې کړې دي.
د افغان خبریالانو مرکز زیاتوي، د طالبانو دا تګلارې «د افغانستان د رسنیو قانون او اطلاعاتو ته د لاسرسي له قانون سره ښکاره په ټکر کې دي.»
دې مرکز لیکلي، د افغانستان خلک د طالبانو د سیاست له امله، د اطلاعاتو په مطلق تیاره کې ژوند کوي. د دې مرکز په وینا، طالبانو د خلکو د اړتیا وړ معلومات سخت محدود کړي او له خلکو یې د پوهېدو بنسټیز حق اخیستی دی.
دې بنسټ د طالبانو د امربالمعروف قانون ته په اشارې ویلي، د دې قانون په پلي کېدو سره، د خبریالانو او رسنیو پر کار محدودیتونه په سیستماتیک ډول زیات شوي دي.
د افغان خبریالانو مرکز وايي، طالبانو «د خبرونو په سانسور، د پېښو نه پوښلو بندولو، د ښځینه خبریالانو پر کار بندیز، د ساه کښو انځور نه خپرولو او د اړیکو پراخولو په محدودیت سره» په افغانستان کې خبریالي جرم بللی دی.
یاد مرکز له طالبانو غوښتي، چې «د رسنیو د قانون او اطلاعاتو د لاسرسي قانون ماتونکې تګلارې» لغوه کړي او د سانسور نظام، پر رسنیو څار او د خبریالانو نیول پای ته ورسوي.
دې مرکز له نړیوالې ټولنې او د بیان د آزادۍ له مدافع نړیوالو بنسټونو غوښتي، چې د افغانستان له ګواښ سره مخ خپلواکو رسنیو او خبریالانو ملاتړ زیات کړي.
