ننګرهار کې ځايي سرچینې وايي، د دې ولایت مرکز جلال آباد ښار کې یوه سړي د کورنۍ شخړې په ترڅ کې خپله خواښې او اوښی په ډزو ټپیان کړي او پخوانۍ مېرمن یې تښتولې ده.
رخشانه: جلال آباد ښار کې یوې باخبره سرچینې ویلي، دا پېښه د یکشنبې په ورځ (د تلې ۵ مه) د دریمې امنیتي حوزې اړوند «ګولايي عربان» سیمه کې رامنځ ته شوې ده.
د سرچینې په وینا، دا سړی د دې ولایت د حصارک ولسوالۍ اوسېدونکی دی او تېر کال یې له خپلې ښځې سره د اختلافاتو رامنځ ته کېدو له امله، هغه طلاقه کړې وه.
سرچینې زیاته کړې، د دې جوړې دوسیه په ننګرهار کې د طالبانو په محکمه کې روانه وه او په کې د ځنډ راتلو له امله، دې سړي له لفظي شخړې وروسته، په خواښې او اوښي ډزې کړې دي.
د سرچینې د خبرو له مخې، د دې سړي په ډزو کې خواښې او اوښی یې ټپیان شوي دي. دې سړي وروسته خپله پخوانۍ ښځه له ځان سره تښتولې ده.
د دې پېښې ټپیان یوه روغتیايي مرکز ته لېږدول شوي او د لومړنیو معلوماتو له مخې، روغتیايي وضعیت یې د ډاډ وړ دی.
په ورته وخت ننګرهار کې د طالبانو د امنیه قوماندانۍ ویاند سید طیب حماد، د دې پېښې د پخلي تر څنګ وايي، دې سړي د دغه پېښې تر رامنځ ته کېدو وروسته، خپله پخوانۍ ښځه تښتولې ده.
هغه زیاته کړې، د طالبانو امنیتي ځواکونه د دې پېښې د عامل پېژندلو او نیولو لپاره هڅې پیل کړې دي.
