ننګرهار کې ځايي سرچینې وايي، د دې ولایت غني خېلو ولسوالۍ کې دوه ماشومان د اوبو یوې ذخیرې ته لوېدلي او ژوند یې له لاسه ورکړی دی.
رخشانه: ننګرهار دوه ځايي سرچینو ویلي، دغه پېښه پرون جمعه د (تلې ۱۰ مه) د دې ولایت د غني خېلو ولسوالۍ د «۲۹ کانال» سیمه کې رامنځ ته شوې ده.
د سرچینو په وینا، دغه دوه ماشومان د لوبو پر مهال د اوبو ذخیرې منځ ته ورلوېدلي او ژوند یې له لاسه ورکړی دی.
سرچینو زیاته کړې، د اوبو ذخیره د کور د ننه وه او له اوبو څخه یې د څښاک لپاره ګټه اخیستل کېده.
د سرچینو د خبرو له مخې، دواړه ماشومان سره د تره زامن وو.
د ماشومانو عمرونه درې او څلور کاله ښودل شوي دي.
ننګرهار کې ځايي طالب چارواکو تر اوسه په دې اړه څه نه دي ویلي.
