ملګري ملتونه په خپل تازه راپور کې وايي، د ۲۰۲۳ میلادي کال له پیله یې د ۲۰۲۵ تر پاي پورې، د طالبانو تر واک لاندې افغانستان کې د ماشومانو له حقونو د جدي سرغړونو څلور زره او ۵۸۲ پېښې ثبت کړې دي.
رخشانه: دا راپور تازه «په افغانستان کې په وسله والو شخړو کې ماشومان» تر عنوان لاندې د ملګرو ملتونو له خوا خپور شوی دی.
په راپور کې راغلي، چې د یو زره ۹۹۳ ماشومانو د حقونو په وړاندې په جدي سرغړونو کې، یو زر او ۶۸۵ هلکان، ۳۲۴ نجونې او ۱۱ تنه د نامعلوم جنسیت ماشومان شامل دي.
ملګرو ملتونو په خپل راپور کې لیکلي، دا موارد د تېرو دریو کلونو په پرتله ۳۸ سلنه کموالی څرګندوي.
د دې راپور په موده کې د ماشومانو له حقونو تر ټولو عامه سرغړونه بشري مرستو ته د لاسرسي مخنیوی دی.
ملګرو ملتونو ویلي، افغانستان کې د ماشومانو له حقونو د جدي سرغړونو د پېښو عامل، چې درې زره او ۱۸۰ ماشومان په کې راځي، د طالبانو ډله ده.
د یو زره او ۲۰۲ ماشومانو له حقونو د جدي سرغړونو «عاملان ناپېژانده» د ۳۰ مورده داعش ډله، د اووه مورده «د افغانستان د مقاومت ملي جبهه» یو مورد «د افغانستان د آزادۍ جبهه او د ۱۶۲ مورده عامل هم پاکستاني ځواکونه شوي دي.
راپور کې رغلي، لس نور ماشومان هم د تښتونې او جنسي تېري د څلورو پېښو، درې مورده د جنسي تاوتریخوالي او معلولېدو، دوه مورده د جنسي تاوتریخوالي او وژل کېدو او یو مورد هم د سړي تښتونې او وژنې قرباني شوي دي.
همدارنګه ملګرو ملتونو د راپور په یوه برخه کې ویلي، په تېرو دریو کلونو کې د طالب ځواکونو په لیکو کې د ماشومانو په ګمارنه کې ۸۱ سلنه زیاتوالی راغلی دی.
د دې بنسټ د راپور له مخې، د ۲۰۲۳ کال له پیله د ۲۰۲۵ تر پای پورې ۵۵۷ هلکان چې عمرونه یې ۱۲ کاله وو، د طالبانو په لیکو کې ګمارل شوي دي.
ملګرو ملتونو زیاته کړې، چې له دې ماشومانو ۳۴۱ یې د ملاتړو په رول کې او ۲۱۶ نور یې هم د ملاتړو او هم د جګړې په رول کې کارول شوي دي.
دې بنسټ ویلي، له ډې ډلې ۳۴۲ ماشومان په ۲۰۲۳، ۱۱ ماشومان په ۲۰۲۴ او ۲۰۴ ماشومان هم په ۲۰۲۵ کال کې د طالبانو په لیکو کې ګمارل شوي دي.
ملګري ملتونه وايي، په افغانستان کې د اقتصادي بحران دوام او بېوزلي، د طالبانو په لیکو کې د ماشومانو د جذب او ګمارنې عوامل دي.
د امریکا د بهرنیو چارو وزارت هم په خپل وروستي راپور کې ویلي، چې د طالبانو په لیکو کې د ماشومانو ګمارنه لا هم دوام لري او د دې ډلې سیمه ییزه ځواکونه د ماشومانو د سن په جعل کولو سره، هغوی په خپلو لیکو کې استخداموي.
