UNICEF
د ماشومانو د خوندیتوب سازمان (Save The Children) په افغانستان کې د بشري بحران د دوام په اړه خبرداری ورکړی وايي، راتلونکی کال به افغانستان کې په شدیده خوارځواکۍ د اخته ماشومانو شمېر د ۱۶ سلنه زیاتوالی سره ۱.۱ میلیون ته ورسېږي.
رخشانه: دې بنسټ نن (پنشنبې د تلې ۲۳ مه) د یوه راپور په خپرولو سره د طالبانو تر واک لاندې افغانستان کې د بشري مرستو د کمېدو او پر روغتیايي خدماتو د فشار په اړه اندېښنه ښودلې ده.
د ماشومانو د خوندیتوب سازمان وايي، په ۲۰۲۷ کال کې به په افغانستان کې د بشري مرستو د کمښت او پر روغتیايي خدماتو د فشار له امله، له ۳۰۰ زره زیات نور ماشومان د شدید خوارځواکۍ درملنې ته اړتیا ولري.
اټکل کېږي، چې د ۲۰۲۷ کال د جنورۍ څخه تر دسمبر پورې به شاوخوا ۴.۰۴ میلیونه تر پنځه کلنۍ کم افغان ماشومان د شدیدې خوارځواکۍ درملنې ته اړتیا پیدا کړي. دا شمېره د تېر پړاو په پرتله په ۲۰۲۶ کال کې ۹ سلنه زیاتوالی ښيي.
همدارنګه شمېرل کېږي، چې په شدیده خوارځواکۍ د اخته ماشومانو شمېر به راتلونکی کال د ۱۶ سلنه زیاتوالي سره د ۲۰۲۶ کال د ۹۴۲ زره ماشومانو څخه نېږدې ۱.۱ میلیون ماشومانو ته ورسېږي.
د ماشومانو د خوندیتوب سازمان د راپور له مخې، په افغانستان کې په دې موده کې په شدیده خوارځواکۍ د اخته ماشومانو شمېر تر اوسه پورې تر ټولو لوړې کچې ته رسېدلی دی.
راپور کې راوړل شوي، چې دا مهال ۱۵.۹ میلیونه کسان، چې د ټولو نفوس د ۳۲ سلنې سره برابر دی د لوږې له بحران یا له هغې سخت وضعیت سره مخ دي. په دې شمېر کې ۳.۴ میلیونه کسان د بېړنۍ لوږې سره مخ دي.
د ماشومانو د خوندیتوب سازمان ویلي، د ژمي په رارسېدو سره به د لوږې وضعیت تر دې هم خراب شي، ځکه کرنیز فعالیتونه او کاري فرصتونه کمېږي او آب هوا شرایط لرې پرتو سیمو ته لاسرسی ستونزمنوي.
وړاندوینه شوې، چې د ۲۰۲۶ کال د نوامبر څخه د ۲۰۲۷ تر اپریل پورې شاوخوا ۱۹.۲ میلیونه کسان، له هغې جملې کابو ۱۰ میلیونه ماشومان د لوږې له بحران یا له هغې هم سخت وضعیت سره مخ شي. دا شمېر له اووسنۍ شمېرې څخه شاوخوا ۳.۳ میلیونه زیات دی.
دا سازمان وايي، سره له دې، چې ورښتونه شوي او ښه کرنیز حاصلات تر لاسه شوي دي، خو په افغانستان کې د لوږې بحران د سختېدو په حال کې دی. د بشري مرستو کمښت، د خلکو بې وسي او بې کاري د دې لامل شوې، چې ډېری کورنۍ ونه پوهېږي، چې خپل راتلونکي خواړه څه ډول برابر کړي.
د ماشومانو د خوندیتوب سازمان وايي، د بودیجې د کمښت له امله روان کال ۴۰ روغتیايي مرکزونه، له هغې جملې روغتیايي او د تغذیې کلېنیکونه او ګرځنده روغتیايي ټیمونه د بندېدو له ګواښ سره مخ دي.
افغانستان کې د ماشومانو د خوندیتوب سازمان سیمه ییز مدیر اشیش دامله وايي، «افغانستان د لوږې د یوه خونړي بحران په منګولو کې راګیر دی او د هغو د پای ته رسېدو هېڅ نښه نه لیدل کېږي.»
نوموړي زیاته کړې: «په افغانستان کې اړتیاوې په چټکۍ مخ پر زیاتېدو دي، په داسې حال کې، چې ژوند ژغورنکې سرچینې مخ په ځوړ دي. تر ژمي پورې یوازې څو اوونۍ پاتې دي او د هغه ماشومانو لپاره چې همدا اوس د شدیدې خوارځواکۍ سره مبارزه کوي، د ژمي یخني به ورته ژوند ستونزمن کړي.»
د ماشومانو د خوندیتوب سازمان د تغذیې په برخه کې د ۲۰۲۶ او ۲۰۲۸ کلونو ترمنځ بشري مرستو لپاره د ۳۰۰ میلیون ډالرو د راټولولو د تغذیه شوي راتلونکې نوښت پیل کړی دی.
