د افغانستان یو پخواني جهادي مشر عبدالرب رسول سیاف د طالبانو له خوا د ښځو او نجونو د نیولو دوام ته غبرګون ښودلی دی.
رخشانه: هغه نن (سه شنبې د تلې ۵ مه) په خپله فسبوک پاڼه د یوه پوسټ په خپرولو سره د طالبانو له خوا د ښځو او نجونو نیول «ناروا» بللي دي.
سیاف لیکلي دي: «ای طالبانو دا عیب، شرم او نارواه ده. لاسونه مو هغو ښځو ته چې درته محرمې نه دي، مه وروړی.»
هغه د طالبانو زندانونه «چټل او ناولي» بللي او له دې ډلې یې غوښتي، چې د ښځو او نجونو له نیولو لاس په سر شي.
سیاف ویلي، د ښځو او نجونو نیول د خلکو «اسلامي، انساني او ملي شعایر» داغي کوي.
دې پخواني جهادي مشر په داسې حال کې د طالبانو له خوا د ښځو او نجونو نیولو ته غبرګون ښودلی، چې دې ډلې د هېواد په یو شمېر ښارونو کې د ښځو او نجونو نیولو ته دوام ورکړی دی.
یوناما څه موده وړاندې په یوه راپور کې، په هرات او کار کې د طالبانو له خوا د بې حجابۍ په تور د لږ تر لږه ۵۲ ښځو او نجونو نیونه تایید کړې وه.
یوناما په خپل راپور کې لیکلي، ښايي د ښځو د نیولو ځینې پېښې د نه خپرېدو له امله، ښايي ترې دې شمېرې هم زیاتې وي.
