د ملګرو ملتونو سرمنشي آنتونیو ګوترش په جګړیزو سیمو کې د ښځو او نجونو په وړاندې د تاوتریخوالي د خبرداري ورکولو تر څنګ، د سولې په پروسو کې د ښځو په مانا لرونکي ګډون ټينګار کړی دی.
رخشانه: ګوترش دغه څرګندونې پرون ناوخته سه شنبې د (لړم ۵ مه) د د ښځو، سولې او امنیت په اړه د ملګرو ملتونو د امنیت شورا په علني غونډه کې مطرح کړې.
د ملګرو ملتونو سرمنشي ویلي د ګڼو ناستو، کنفرانسونواو پرېکړه لیکونو له تصویب سره سره، نړۍ کې جنسیتي نابرابرۍ لا هم دوام ولري او شځې له ډېرو خبرو اترو او تصمیم نیونو له بهیره څنډې ته وهل کېږي.
نوموړي زیاته کړې، په جګړو پورې تړلي جنسي تاوتریخوالي په تېر کال کې له ۹ زره او ۷۰۰ مورده زیات شوي، هغه شمېر چې د هغه په وینا، ډېر کم امکان لري، چې دا دې ریښتینې شمېرې وي.
همدارنګه ګوترش په ګڼ مېشتو سیمو کې د چاودېدونکو وسلو د کارولو په ترڅ کې د ښځو او نجونو د مرګ ژوبلې د زیاتېدو او په بحراني سیمو کې میندو د مړینې زیاتوالي باندې اندېښنه ښودلې ده.
د ملګرو ملتونو سرمنشي وايي، د نړۍ په بېلا بېلو سیمو کې، مشرانې، سیاستوالې، خبریالانې، د بشري حقونو مدافعیني او د ښځو د حقونو فعالانې څنډې ته وهل کېږي او په نښه کېږي.
ګوترش افغانستان، مالي، یمن او سومالي له هغو هېوادونو یاد کړي، چې په کې ښځې او نجونو له سختو محدودیتونو او د بشري حقونو له جدي سرغړونو سره مخ دي.
هغه خبرداری ورکړی، چې د طالبانو تر واک لاندې افغانستان کې د ملګرو ملتونو او همکاره سازمانونو پر ښځینه کارکوونکو د محدودیتونو لګول، د هغوی د دندو په وړاندې خنډ جوړ شوی دی.
د ګوترش په وینا، د مالي مرستو کمېدل هم د کلېنیکونو او د ښځو او نجونو لپاره د خوندي چاپېریال په تړل کېدو، د بشري مرستو د ملاتړ په کمېدو او د ښځو اړوند ځینو سازمانونو د فعالیت په بندېدو تمام شوي دي.
د ملګرو ملتونو عمومي منشي و ویل: «د سولې پروسو کې د ښځو ګډون باید سمبولیک نه دي، ځکه د سولې بهیرونه هغه مهال د پایښت له زیات چانس څخه برخمن کېدای شي، په هغو کې ښځې په مانا لرونکې توګه ګډون ولري او د ټولنو د راتلونکې په جوړولو کې برابر ځای ومومي.
نوموړي زیاته کړې، تېر کال د سولې اړوند ۵۷ بهیرونو کې یوازې پنځه سلنه ښځې د خبرو اترو برخه وې او د نړۍ د سولې توافق پاڼو کې، له یو پر پنځمې برخې کم موضوعات لکه، ښځې، نجونې، جنسیت یا جنسي تاوتریخوالو ته اشاره کړې وه.
د ملګرو ملتونو سرمنشي د خبرو اترو په ټولو میزنونو کې د ښځو د ګډون، د سولې په توافق پاڼو کې د هغوی د اړتیاو منعکس کولو او د ښځو له سازمانونو د مالي ملاتړ د زیاتوالي، په ځانګړې توګه له جګړې د اغېزمنو سیمو او جبري کډوالو غوښتنه وکړه.
ګوترش د ملګرو ملتونو له غړو هېوادونو وغوښتل، چې د خپلو مرستو د پراخولو په ژمنو عمل وکړي او په ټوله نړۍ کې د دې د ښځو او نجونو د ملاتړو سازمانونو بودجه بیا تامین کړي.
