غزني ښار کې ځايي سرچینې وايي، طالبانو یوه نظامي موټر د دې ولایت په مرکز کې د یوې ښځې او څلورو ماشومانو په ګډون اته تنه لاندې کړي او وژلي یې دي.
رخشانه: غزني ښار کې دریو سرچینو رخشانې رسنۍ ته ویلي، دا پېښه نن سهار (چهارشنبې د لړم ۱۳ مه) د دې ولایت د مرکز اړوند د «روضې کوتل» په سیمه کې رامنځ ته شوې ده.
د سرچینو په وینا، دا پېښه د طالبانو د یوه نظامي «انټرنشنل» ډول موټر له خوا د د یوه «ویډز» مسافروړونکي موټر لاندې کولو رامنځ ته شوې، چې اته واړه سورلۍ یې ژوند له لاسه ورکړی دی.
سرچینو زیاته کړې، د دې پېښې د قربانیانو په منځ کې یوه ښځه او څلور ماشومان هم شامل دي.
د دې ترافیکي پېښې د قربانیانو په اړه نور جزیات نه دي ورکړل شوي.
په ورته وخت غزني کې د طالبانو د امنیه قومندانۍ ویاند ابوخالد سرحدي، د دې پېښې رامنځ ته کېدل تایید کړي دي.
نوموړي ویلي، دا پېښه د مسافر وړونکي موټر چلوونکي له خوا د ترافیکي اصولو نه رعایت کولو له امله رامنځ ته شوې ده.
له دې وړاندې هم د هېواد په بېلا بېلو ولایتونو کې د طالبانو اړوند موټرونو له خوا یو شمېر هېوادوال وهل شوي او مړه شوي دي.
