فاریاب کې د طالبانو امنیه قومانداني وايي، د دې ولایت د مرکز میمنې ښار په لومړۍ ناحیه کې یوه سړي خپله ښځه او خواښې وژلې دي.
رخشانه: دا پېښه پرون چهارشنبې د (لړم ۲۰ مه) د فاریاب د مرکز میمنې ښار د لومړۍ ناحیې په «دم قول» سیمه کې رامنځ ته شوې ده.
د امنیه قوماندانۍ په خبرپاڼه کې راغلي، په دې پېښه کې یوه سړي، خپله ښځه او خواښې وژلې او د کورنۍ دوه نور غړي یې ټپیان کړي دي.
فاریاب کې د طالبانو امنیه قومانداني ویلي، دا پېښه د کورنیو اختلافاتو له امله رامنځ ته شوې ده.
د قربانیانو د هویت، عمر او د ټپیانو د روغتیايي حالت په اړه معلومات په لاس کې نشته.
معلومه نه ده، چې دا ښځه او مور یې د څه شي په وسیله د دغه سړي له خوا وژل شوي دي.
طالبانو ویلي، دغه سړی د ښځې او خواښې تر وژلو وروسته له سیمې تښتېدلی وو، خو طالب ځواکونو ونیوه.
د طالبانو له بیا واکمنېدو وروسته، د کورنیو د غړو له خوا د ښځو او نجونو د وژنو پېښې زیاتې شوې دي.
د رخشانې رسنۍ د شمېرو له مخې، د روان ملادي کال له پیله تر اوسه پورې ۲۸ ښځې او نجونې د هېواد په یو شمېر ولایتونو کې د خپلو کورنیو د غړو له خوا وژل شوې دي.
