سینا سعیدي
دغه څه چې لولۍ د یوې هغې زده کوونکې نجلۍ کسیه ده، چې د طالبانو له لوري یې د انګلیسي ژبې د زده کړې مرکز د دروازو په تړلو سره هیلې او ارزوګانې پر باد لاهو شوې، هغه هیلې او امیدونه چې د دې په وینا ورځ بلې رنګ بایلي.
د دغه زده کوونکې د هویت پټ ساتلو لپاره په دې کیسه کې د نوموړې په خپله غوښتنه د هغې د اصلي نوم او هر هغې نښې له راوړلو چې کېدای شي د دې اصلي هویت افشا کړي ډډه شوې او د تمنا په مستعار نوم یې نوم راوړل شوی دی.
۱۴ کلنه تمنا د غور ولایت د لعل او سرجنګل ولسوالۍ د نجونو د یوه ښوونځي د شږم ټولګي زده کوونکې او د خپل ټولګي اول نمره ده. د هغې د لیدو ته د اوړي په سره ګرمۍ او د هغوی د څلورنیمې میاشتنې ازموینې پر مهال ورغلم.
تمنا وايي، ډېره مینه یې له انګلیسي او ریاضي سره ده، دا خوښه یې د افق جدید په نوم د انګلیسي ژبې په یوه څو میاشتني مرکز کې د زده کړو له امله ده، هغه مرکز چې د لومړي ځل او پنځو میاشتو لپاره په لعل او سرجنګل ولسوالۍ کې پرانستی وو او وروسته له هغې د طالبانو له لوري پرته له کوم دلیله د تل لپاره وتړل شو.
سږ کال چې پای ته ورسېږي، نو تمنا به هم له هغه میلیونونو نجونو سره یو ځای شي، چې ښوونځي ته د تګ اجازه نه لري، خو د تمنا زړه له دې ورځو زیات د زده کړو د هغه مرکز له دروازې سره تړلی، چې ټاکل شوې وه لږ تر لږ په کې انګلیسي ژبه تر لوړې کچې زده کړي.
د «جي. آر. اس» موسسې پر مټ دغه ښوونیز مرکز د تېر لمریز کال د مني په لومړیو کې د کابو یو سله شل نجونو لپاره د انګلیسي ژبې د زده کړو زمینه برابره کړې وه، دغه شمېر زده کوونکو د یوې ازموینې له لارې یاد ښوونیز مرکز ته لار ومونده.
تمنا و ویل:«کابو دوه سوه تنو په ازموینه کې ګډون کړی وو او له دې دلې یوازې ۱۲۰ تنه جذب کېدل، د همدې لپاره ما څو ورځې د ازموینې لپاره چمتوالی نیوه تر څو مې سویه تثبیت شي، دویم نفر او د ۱۲۰ تنو په منځ کې ومنل شم، سره له دې چې له ښوونځي پرته مې بل ځای انګلیسي نه وه ویلې، خو بیا هم دویم کتاب ته ومنل شوم، کله چې د ازموینې پایلې اعلان شوې ډېره خوښه شوم.»
په لعل او سرجنګل ولسوالۍ کې د نجونو لپاره د انګلیسي ژبې د دغه ښوونیز مرکز پرانستو د روښانه راتلونکې لپاره یو زېری وو، چې له پنځو میاشتو زیات یې دوام ونه کړ، زده کوونکو نجونو د لومړي ځل لپاره دا فرصت تر لاسه کړی وو، چې د کور د کارونو تر څنګ، چې په کلیو کې معمول دی د ژبې د زده کړو لپاره هم لاړې شي.
د تمنا د ژوند تر ټولو ښې ورځې د هغې په خپله وینا هغه ورځې وې، چې د ښوونیز مرکز دروازه د دې او نورو نجونو پر مخ پرانستې وه:«زما په دا کم عمر دا ورځې زما لپاره د ژوند تر ټولو ښې ورځې وې، هېڅکله به مې هېر نه شي، چې طالبانو زما په برخلیک او راتلونکې څه وکړل.»!
د دغه زده کوونکې د ګوتو په شمار سره، شاوخوا پنځه میاشتې او ۲۹ ورخې کېږي، چې د یاد ښوونیز مرکز درواز، چې د هغې او د کلي د نورو نجونو لپاره یې هیلې پیدا کړې وې، د دوی پر مخ تړل شوې ده.
تمنا خپلې کیسې د یادښت په کتابچه کې په دوه برخو وېشلې دي: د ژبې د ښوونیز مرکز د تړل کېدو څخه مخکې ورځې او د هغې څخه وروسته ورځې.
نوموړې د یاداښت کتابچې په پنځم مخ کې داسې لیکلي دي:«…وروستۍ ازموینه واخستل شوه، ما له خدای نه تمه درلوده چې پاتې نه شم، زه د کورس اول نمره شوم. د ۱۲۰ نورو نجونو منځ کې مې بشپړې نمرې اخیستې وې، هېڅوک نه وو توانېدلي، چې زما په شان پوره نومرې واخلي.»
دغه زده کوونکې د انګلیسي ژبې ښوونیز مرکز له تړل کېدو وروسته خپلې کیسې څه داسې بیان کړې دي:«….وامې ورېدل، چې د جي. آر. اس کورس تړل شوی دی، باور مې ونه کړ سهار[چې کله ښوونیز مرکز ته لاړم] ومې لیدل چې ښوونکی نه دی راغلی او پوه شوم، چې زما د خوښې وړ کورس تړل شوی دی، په ژړا ژړا کور ته راغل، زما زړه همدې کورس ته ښه وو چې یو ګام پرمختګ وکړم.»
هغې ته کیسه پر دې ځای پای نه مومي، څو میاشتې وروسته د ښوونځي شپږم ټولګی هم پای ته رسوي او هغه دا چې بل کال حق نه لري، ښوونځي ته لاړه شي. طالبانو له ۱۴۰۸ زیاتې ورځې کېږي، چې د ښوونځیو دروازې له شپږم پورته نجونو پر مخ تړلې دي.
تمنا له څو لحظې خبرو اترو وروسته چوپ کېناسته، پورته شوه، د کوټې کړکۍ ته ودرېده او له لرې یې د تړل شوي ښوونیز مرکز ودانۍ او دروازې ته کتل، د ښوونیز مرکز د تړل کېدو ناورین د هغې له ډک ستوني او له اوښکو ډکو سترګو ښه ترا پوهېدای شو، د کاته له ډول یې پوهېدا شو، چې د دغه کتو تر شاه د تمنا او نورو زده کوونکو نجونو د ښو ورځو له لېوالتیا او راتلونکو ورځو له نابودۍ پرته چې طالبان یې لامل دي، بل څه نه دي پراته.
تمنا خپلې اوښکې پاکې کړې، کتابچه او کتابونه یې راکوزوي او خپلې تر سره کړې کورنۍ دندې راښيي، د کتابچو په هره پاڼه کې یې تر کورنۍ دندې لاندې په انګلیسي ژبه «عالي» لیکل شوي او تر څنګ یې ستوري هم انځور شوي دي. د ښې جمله بندۍ ستوري او د ښه لیک او له تېروتنې پرته جملو لپاره ستوري. ټولې کورنۍ دندې یې لاسلیک شوې دي، پرته له یوې پاڼې چې وروستي پاڼه ده او د ښوونیز مرکز د تړل کېدو له ورځې سره سمه شوه، هغه کورنۍ دنده چې پنځه میاشتې او ۲۹ ورځې کېږي نه ده لاسلیک شوې. د یوې پانې لاسلیک کېدل او نه لاسلیک کېدل دومره مساله نه ده، خو پایله یې د یوه بې سبا نسل او کډه شوي خوبونه دي.
