د کابل په لوېدیځ کې یوې کورنۍ ادعا کړې، چې ۱۷ کلنه لور یې د طالبانو د امربالمعروف ځواکونو له خوا تر نیول کېدو وروسته لا درکه شوې ده.
رخشانه: د دغه نجلی یوه خپلوان د هویت په پټ ساتلو سره رخشانې رسنۍ ته ویلي، چې هغه د شنبې ورځ ماسپښين مهال ۲:۰۰ بجې د توکو اخیستو لپاره «برچي سنټر» ته تللې وه او نور کور ته نه ده راغلې.
هغه زیاته کړې، دغه ځوانې نجلۍ «تور اوږد حجاب اغوستی وو» خو طالبانو له کوم ځانګړي دلیل پرته نیولې ده.
د رخشانې رسنۍ سرچینه ادعا کوي، چې د طالبانو د امربالمعروف ځواکونو له خوا د دوی د لور له نیول کېدو وروسته د کابل لوېدیځ کې ټولو حوزو او دغه ډلې نورو امنیتي ارګانونو ته ورغلي، خو د هغې هېڅ درک یې نه دی معلوم کړی.
نوموړي په اندېښنې سره و ویل«دوه ورځې کېږي له لور مې هېڅ احوال نه لرم، معلومه نه ده چې چېرې ده، تلفون یې هم غلی دی، وېرېږم چې طالبان به مې نور لور پرېنږدي.»
د طالبانو د امربالمعروف ځواکونو په تېرو څو ورځو کې د کابل ښار له بېلا بېلو سیمو څه تر ۱۰۰ زیاتې نجونې او ښځې د اسلامي حجاب نه مراعت کولو په تور نیولې او نامعلوم ځای ته یې لېږدولې دي.
له دغه ښځو او نجونو یو شمېر هغه یې له یوې شپې ورځې زندان تېرولو وروسته په ضمانت خوشې شوې دي.
د طالبانو له لوري په کابل کې د ښځو او نجونو نیولو د معرضه مېرمنو او بشري حقونو د بنسټونو غبرګونونه راپارولي دي.
معترضو ښځو او د بشري حقونو بنسټونو د طالبانو له بنده د نیول شویو ښځو او نجونو د ژر تر ژره خوشي کېدو غوښتنه کړې ده.
په افغانستان کې د ملګرو ملتونو مرستندویه پلاوي (یوناما) په کابل کې د طالبانو له لوري د ښځو او نجونو په نیول کېدو اندېښنه څرګنده کړې ده.
