افغان خبریاله خدیجه ماري امین وايي، «اولادونه مې چېرې دي؟» مستند چې د دې د ژوند کیسه ده، په هسپانیه کې د «زوم» جشنوارې د ۲۴ دورې د «جنسیتي برابرۍ» جایزې وګټله.
رخشانه: دې خبریالې نن (یکشنبې د لندۍ اوله) په خپله فسبوک پاڼه د یوه پوسټ په خپرولو سره د دې جایزې تر لاسه کولو خبر ورکړی دی.
خدیجه امین ویلي، دا مستند د څلورو تر ټولو ښو مستندونو تر منځ د جایزې په تر لاسه کولو بریالی شو.
دغې افغان خبریالي لیکلي، دا مستند له اولادونو د دې د لرې والي کیسه او د هغوی د بیا لیدلو لپاره د دې د دویم ځلي هڅو کیسه ده.
نوموړې لیکلي: «دا د زرګونو هغو ښځو کیسه هم ده، چې کورنۍ تاوتریخوالی یې څکلی او له اولادونو یې لرې پاتي شوي دي.»
دې ښځینه خبریالې د ښځو او نجونو پر ژوند د طالبانو محدودیتونو ته په اشارې زیاته کړې، افغان ښځې هڅه کوي خپل غږ پورته کړي تر څو یې نکلونه واورېدل شي.
نوموړې دا جایزې په ټولو هغو میندو پورې اړوند بللې، چې «د خپلو اولادونو بیا لیدو ته سترګې په لار دي.»
د هسپانیا د زوم جشنواره د مستند او فلیم، تلوېزیوني تولیداتو او ډیجیټل پلټفارمونو کې یوه معتبره پېښه ده، چې هر کال د هسپانیا په کاتلونیای ایالت کې تر سره کېږي.
خدیجه ماري امین د افغانستان د ملي تلوېزیون خبریاله او ویانده وه، چې واک ته د طالبانو په بیا رسېدو سره، په دې رسنۍ کې له کار کولو بنده او د هېواد پرېښودو ته اړ شوه.







