د «آزادۍ پر لور د ښځو غورځنګ» غړو د نوامبر ۲۵ مې «د ښځو په وړاندې د تاوتریخوالي نړیوالې ورځې» په درشل کې ویلي، له خپلو اساسي حقونو د ښځو سیستماتیک محرومول، د جوړښتي تاوتریخوالي څرګنده بېلګه ده.
رخشانه: د دې اعتراضي غورځنګ غړو نن (یکشنبې د لیندۍ اوله) د یوه پرېکړه لیک په خپرولو سره، د طالبانو تر واک لاندې افغانستان کې د ښځو او نجونو د ملاتړ غوښتنه وکړه.
د «آزادۍ پر لور د ښځو غورځنګ» په پرېکړه لیک کې راغلي، افغان ښځې او نجونې د تاریخ په یوه تر ټولو تیاره او سخته دوره کې ژوند کوي.
معترضو ښځو ویلي، افغانستان کې د ښځو په وړاندې تاوتریخوالی یوازې په فزیکي او ټولنیز تاوتریخوالي نه محدودېږي، بلګې په پراخه ډولو له هغې جملې د زده کړو، کار، د تګ راتګ آزادۍ، سیاسي او ټولنیز ګډون له حق څخه په محرومولو کې یې دوام موندلی دی.
دوی ویلي، له زده کړو د نجونو محرومول او د کار له بازار او عمومي ژوند څخه د ښځو ایستل، په افغانستان کې د ښځو د حقونو او انساني کرامت څخه د سیستماتیکو سرغړونو بېلګې دي.
د دوی په وینا، پراخه بېوزلي، جبري او له وخته مخکې ودونه، کورني تاوتریخوالي، رواني ځورونه، جبري کډوالي او له روغتیايي او ملاتړو خدماتو محرومیت، د ښځو او نجونو د زیان مننې که لا زیاته کړې ده.
د «آزدۍ پر لور د ښځو غورځنګ» غړو ټینګار کړی، چې د تاوتریخوالي پر وړاندې چوپتیا د تاوتریخوالي دوام دی او هېڅ ټولنه له د ښځو له آزادۍ، امنیت، عدالت او برابرۍ پرته نه شي کولی سولې او ثبات ته ورسېږي.
معترضو ښځو ویلي «د ښځو په وړاندې هېڅ ډول تاوتریخوالی، تر هېڅ یوه نوم لاندې، په هېڅ عنوان، دود، کلتور یا سیاسي او مذهبي توجیه د منلو وړ نه دی.»
د دوی په باور له خپلو اساسي حقونو د ښځو سیستماتیک محرومول او د ژوند له عمومي اړخونو د هغوی ایستل د جدي تبعیض او جوړښتي تاوتریخوالي بېلګه ده.
د «آزادۍ پر لور د ښځو غورځنګ» غړو د جوړښتي تاوتریخوالي، جنسیتي تبعیض او د ښځو او نجونو پر حقونو د طالبانو د محدودیتونو د لغوه کولو غوښتنه وکړه.
د دې اعتراضي غورځنګ غړو په هېواد کې د نجونو پر مخ په بېړنۍ توګه د ښوونځیو او پوهنتونونو د دروازو د پرانستو او د ښځو پر کار د لګول شویو محدودیتونو پر لرې کولو ټينګار وکړ.
دوی له ملګرو ملتونو، د بشري حقونو له شورا او د بشري حقونو له نړیوالو بنسټونو وغوښتل، چې د افغان ښځو د حقونو د سرغړونو په وړاندې غلي نه شي او په دې برخه کې عملي او ګټور ګامونه پورته کړي.
همدارنګه معترضو ښځو د بشري حقونو د جدي سرغړونو د څېړلو او حساب ورکولو او د ښځو سره د ناوړه چلند او ظلم مسوولینو د حساب ورکولو لپاره د خپلواکو میکانېزمونو د ملاتړ غوښتنه هم وکړه.







