په بامیانو ولایت کې سیمه ییزه سرچینې رخشانې رسنۍ ته وايي، طالبانو د والي په امر د دغه ولایت د پنجاب ولسوالۍ په «رشک پشته غرغری» کلي کې ۲۵ کورونه مهر ولاک او کورنۍ یې ترې په زور کډه کړې دي.
رخشانه: د بامیانو پنجاب ولسوالۍ کې یوې سیمه ییزې سرچینې د هویت پټ ساتلو سره رخشانې رسنۍ ته ویلي، د طالبانو یو پلاوی نن (دوشنبې د زمري ۶ مه) د رشک کلي ته ورغلي تر څو د هغه ځای اوسېدونکي کډه کړي.
د سرچینې په وینا، طالبانو د دغه کلي اوسېدونکو ته چې ټول یې له هزاره قوم څخه دي، ۱۵ ورځې وخت ورکړی وو، چې کلی خالي کړي او دغه موده د تېرې اوونۍ د پنشنبې په ورځ پای ته ورسېده.
د سرچینې په خبره، د یاد کلي اوسېدونکو په ټاکل وخت کې د طالبانو د پلاوي ورتګ ته انتظار وو او کلی یې نه وو پریښي، خو د طالبانو پلاوی نن دغه کلي ته راغلی تر څو خلک په اجباري توګه کډه کړي.
سرچینې زیاته کړې، د دغه کلي ټولې ښځې او ماشومان له کورونو شړل شوي دي.
سرچینه وايي، د طالبانو د پلاوي له راتګ وروسته د دې کورنیو نارینه وو کلی پريښي، تر څو د طالبانو ځواکونه پر دوی د اجباري ایستلو پرېکړه«په زورلاسلیک نه کړي.»
هغه ویلي«په کلي کې نارینه شتون نه لري، د طالبانو وسله وال کسان د خلکو له کورونو کډې باسي، که طالبان نارینه پیدا کړي، هغوی نیسي او په زور پرېکړه پرې لاسلیک کوي.»
د رخشانې رسنۍ سرچینې و ویل، د طالبانو پلاوی«د سترې محکمې دوه پرېکړه لیکونه» نه مني او د رشک کلي خلک په زور کډه کوي.
د سرچینې د خبرو پر بنسټ، طالبانو ورسره ښځینه پولیسې هم راوستې، ښځې، ماشومان او د کور توکي په زور له کورونو څخه ایستلي دي.
طالبانو ۲۵ کورونه مهر و لاک کړي، ښځې او ماشومان یې له خپلو کورونو په زور او جبر سره ایستلي دي.
د رخشانې رسنۍ سرچینې ټینګار وکړ، چې د طالبانو ځواکونه لا هم د کلي څخه بهر د اړیکو نیولو اجازه نه ورکوي.
