په افغانستان کې د ملګرو ملتونو مرستندویه پلاوي (یوناما) په کابل کې د طالبانو له لوري د ښځو او نجونو په نیول کېدو اندېښنه څرګنده کړې ده.
رخشانه: یوناما نن (دوشنبې د چنګاښ ۳۰ مه) په خپله اېکس پاڼه د یوه پوسټ په کولو سره لیکلي، چې طالبانو د روانې میلادي میاشتې د ۱۶ مې او ۱۹ مې نېتې ترمنځ کابل کې ګڼ شمېر نجونې او ښځې د حجاب نه مراعت کولو په تور نیولې دي.
په افغانستان کې د ملګرو ملتونو مرستندویه پلاوي زیاته کړې، چې د زیاتو معلوماتو تر لاسه کولو لپاره له طالبانو سره په اړیکه کې دي.
یوناما لیکلي، چې دا پېښې د نجونو او ښخو د لا نورې انزوا، وېرې او ډار د فضا او عمومي باور له منځه تلو لامل ګرځي.
یوناما له طالبانو غوښتي ټول هغه سیاستونه او فرمانونه چې د ښځو او نجونو بشري حقونه او اساسي خپلواکۍ محدودوي لغوه کړي.
طالبانو په تېرو څو ورځو کې د کال ښار له بېلا بېلو سیمو څخه شاوخوا ۱۳۰ نجونې او ښخې د حجاب نه مراعت کولو په تور نیولې دي.
مخکې سرچینو رخشانې رسنۍ ته ویلي وو، چې یو شمېر ښځې او نجونې له یوې شپې او ورخې بند تېرولو وروسته د طالبانو له زندان څخه خوشې شوې دي.
تراوسه د طالبانو له بند خونو د نیول شویو مېرمنو او نجونو د خلاصون په اړه کوم خبر نشته.
