سمنګان کې د طالبانو امنیه قوماندانۍ په یوه خبرپاڼه کې ویلي، د دې ولایت په حضرت سلطان ولسوالۍ کې یوه ښځه د خپل خاوند له خوا وژل شوې ده.
رخشانه: خبرپاڼه کې راوړل شوي دا پېښه نن (یکشنبې د لړم ۱۰ مه) مازیګر مهال رامنځ ته شوې ده.
د خبرپاڼې له مخې، دا ښځه د خپل مېړه له خوا د چړې په ګوزارونو وژل شوې ده. دې ښځې د سر په برخه کې د سختو ټپونو له امله ژوند له لاسه ورکړی دی.
سمنګان کې د طالبانو امنیه قوماندانۍ د دې پېښې لامل او انګېزه کورنۍ ستونزې بللې دي.
طالبانو ویلي، د ښځې مېړه نیول شوی دی.
دې دلې د دغې ښځې د هویت په اړه زیات معلومات نه دي ورکړي.
د ۲۰۲۱ په اګست کې د طالبانو په بیا راتګ سره، په افغانستان کې د خپلو کورنیو له خوا د ښځو او نجونو د وژنو پېښې په بې مخینې توګه زیاتې شوې دي.
