د افغان محصلې سارا ګوهري ایرانی مدافع وکیل رضا شفاخواه ویلي، هغه د مشهد استخباراتو د «انفرادي نیونې» ادارې څخه د تربت جام زندان ته لېږدول شوې ده.
رخشانه: ښاغلي شفاخوا نن (یکشنبې د زمري ۵ مه) په خپله اېکس پاڼه د یوه پوسټ په کولو سره ویلي، اغلې ګوهري د تربت جام له زندان څخه د ده سره اړیکې نیولې ده.
دغه مدافع وکیل لیکلي، د سارا ګوهري د تور دوسیه «د نظام پر وړاندې د پروپاګند تر سرلیک لاندې د تایباد ولسوالۍ د څارنوالۍ په دفتر کې روانه ده.»
۲۹ کلنه سارا ګوهري چې تهران پوهنتون کې د ټولنپوهنې پوهنځۍ محصله ده، څه موده وړاندې یې لیکلي وو، غواړي د ایران څخه په ډلیزه توګه د ایستل کېدوونکو افغان کډوالو د ایستنې د شرایطو په اړه د څېړنو او پلټنو لپاره تایباد ولسوالۍ پولې ته ولاړه شي.
دغه افغان محصله د چنګاښ په ۱۵ مه نېټه د ایران د استخباراتو وزارت د مامورینو له خوا د تایباد په پوله ونیول شوه او نامعلوم ځای ته ولېږدول شوه.
مخکې له دې د ښځو او بشري حقونو ډلو د ایران له حکومته غوښتي وو، چې سارا ګوهري ژر تر ژره خوشې او د هغې د وضعیت او ځای په اړه په روښانه او دقیقه توګه د نوموړې کورنۍ ته معلومات ورکړي.
د سارا ګوهري نیولو په خواله رسنیو د غبرګونونو څپه له ځان سره درلوده، د خواله رسنیو کاروونکو د «سارا ګوهري چېرته ده» تر نوم لاندې کمپاین پیل کړ او د ایران د دولت څخه یې د هغې د خوشي کولو غوښتنه کوله.
