په «جلاوطنې کې د افغان ښځو غورځنګ» غړو د نوامبر د ۲۵ مې «د ښځو په وړاندې د تاوتریخوالي له منځه وړلو نړیوالې ورځې» په درشل کې ویلي، افغانستان کې د ښځو په وړاندې تاوتریخوالی نه باید په یوه عادي او هېر شوي واقعیت بدل شي.
رخشانه: د دې اعتراضي غورځنګ غړو په یوه بیانیه کې لیکلي دي، «د ښځو په وړاندې د تاوتریخوالي له منځه وړلو نړیواله ورځ» د تاوتریخوالي، ځپلو، وژنو، تبعیض او له تر ټولو لومړنیو انساني حقونو د محرومیت د کلونو یادونکي دي.
په «جلاوطنۍ کې د افغان ښځو غورځنګ» غړو په بیانیه کې راغلي، افغان ښځې د زده کړو، کار، فردي او ټولنیزو آزادیو په محرومیت سره، له جبري ودونو، کورني او جوړښتي تاوتریخوالي سره مخ دي.
بیانیه کې راوړل شوي: «د تېرو کلونو هدفي وژنو، چاودنو او خوړنيو بریدونو د افغانستان د ټولنې په ځانګړې توګه د ښځو، نجونو او زیان مننونکو ټولنو پر بدن ژور ټپونه ایښي دي.»
د معترضو ښځو په وینا، په ګاونډیو هېوادونو کې هم افغان کډواله ښځې د کډولۍ، بېوزلۍ، بې سرپنايۍ، د جبري ایستلو له ګواښ، روغتیايي او د زده کړو خدماتو ته له کم لاسرسي او حقوقي ملاتړ پرته شرایطو کې ژوند کوي.
په «جلاوطنۍ کې د افغان ښځو غورځنګ» له ملګرو ملتونو، د بشري حقونو له نړیوالو بنسټونو، دولتونو او د ښځو د حقونو له مدافع سازمانونو غوښتي، چې د افغان ښځو د حقونو په وړاندې د پراخو سرغړونو په وړاندې چوپ پاتې نه شي.
همدارنګه دوی له ملګرو ملتونو او د بشري حقونو له نړیوالو بنسټونو غوښتي، چې د تاوتریخوالي د درولو او د بشري حقونو د سرغړونو د ځواب وینې لپاره عملي اقدامات تر سره کړي.
دغه راز معترضو ښځو په ګاونډیو هېوادونو کې د افغان کډوالو ښځو په ملاتړ هم ټيڼګار کړی او افغانستان ته یې د هغوی د جبري نه ایستلو او نه ستنولو غوښتنه کړې ده.







