د افغانستان د خبریالانو مرکز (AFJC) خبر ورکړی، چې په وروستیو څو اوونیو کې لږ تر لږه ۷ تنه خبریالان او رسنیز فعالان د طالبانو له خوا په کابل او یوه بل ولایت کې نیول شوي او کاري توکي یې ترې اخیستي دي.
رخشانه: د خبریالانو مرکز تېره ورځ ناوخته(دوشنبې د زمري ۶ مه) د یوې اعلامیې په خپرولو سره د رسنیو د آزادۍ د ځپلو په شدت، د خبریالانو او رسنیزو فعالانو په نیولو اندېښنه څرګنده کړې ده.
د خبریالانو د مرکز په اعلامیه کې راغلي، دغه اووه تنه د طالبانو د استخباراتو او امربالمعروف ځواکونو له خوا په کابل او یوه بل ولایت کې نیول شوي، خو یاد مرکز د بل ولایت نوم نه دی اخیستی.
د افغانستان د خبریالانو مرکز لیکلي، یو خبریال د چنګاښ په ۶ مه په یوه ولایت کې د طالبانو د استخباراتو له خوا په دې تور چې ګواکي د طالبانو د پالیسۍ خلاف راپورونه یې چمتو کول نیول شوی او دوه ورځې وروسته په ضمانت خوشی شوی وو.
یاد مرکز دغه راز لیکلي، د طالبانو استخباراتي او د امربالمعروف ځواکونو د چنګاښ په ۲۴ مه د «پیکسل» په نوم رسنیز شرکت په دفتر چاپه وهلې، د دغه شرکت رییس نوید احمد اصغري او د هغه مرستیال مشتاق احمد حلیمي یې نیولي او کاري توکي یې ترې ضبط کړي دي.
د خبریالانو د مرکز په وینا، یو تن بیا د کابل په کارته سه سیمه کې د بهرنیو رسنیو د ویب پاڼو د ډیزاین او د دې ویب پاڼو لپاره د تخنیکي ملاتړ په تور د طالب استخباراتو له خوا نیول شوی دی.
دغه راز د خبریالانو مرکز زیاته کړې، یو خبریال او دوه رسنیز فعالان بیا د تېرې اوونۍ د پنشنبې (زمري ۲ مه) د هېواد په یوه ولایت کې د نجونو لپاره د دوريي زده کړو برابرولو په تور د طالبانو د استخباراتو له خوا نیول شوي او کاري توکي یې ترې اخیستي دي.
د افغانستان د خبریالانو مرکز ویلي، د امنیتي ننګونو له امله د طالبانو له خوا د نیول شویو خبریالانو او رسنیزه فعالانو هویت، د پېښو د څرنګوالي او د هغوی د قضیو جزیات نه شي خپرولی.
یاد مرکز د احمد نوید اصغري د جبري اعتراف په اړه، چې ځان د «پیکسل» شرکت مدیر راپېژني ویلي«روښانه نه ده چې دا ویډیو څنګه او تر کومو شرایطو لاندې کې اخیستل شوې ده.»
د افغانستان د خبریالانو مرکز د دغه ۷ تنو خبریالانو او رسنیزو فعالانو نیول کېدل غندلي او له طالبانو یې غوښتي، چې د بیان او رسنیو آزادۍ ته په درناوي، نیول شوي خبریالان، رسنیز فعالان او دغه راز نور خبریالان له زندان څخه خوشي کړي.
یاد مرکز وايي، تر اوسه لږ تر لږه ۱۵ خبریالان، کار کوونکي او رسنیز فعالان د طالبانو له خوا زنداني شوي دي.
طالبانو په خپله تېره څلور کلنه واکمنۍ کې په هېواد کې د خبریالانو او رسنیو کارکوونکو په نیولو سره په هېواد کې د رسنیو فعالیت محدود کړی دی.
