غور کې سیمه ییزه سرچینې وايي، د دغه ولایت په لعل و سرجنګل ولسوالۍ کې یوې ځوانې ښځې ځان ځړولی او ژوند ته یې د پای ټکی اېښی دی.
رخشانه: غور کې دوه سیمه ییزه سرچینو رخشانې رسنۍ ته ویلي، دغې ځوانې ښځې نن (پنشنبې د زمري ۹ مه) د دې ولایت د لعل و سرجنګل ولسوالۍ په «کشک پایین» کلي کې ځان وژنه کړې ده.
د سرچینې په وینا، یادې ښخې د خاوند له تلو وروسته، له رسۍ په ګټې اخیستنې په خپل کور کې ځان راځړولی دی.
سرچینې زیاته کړې، دغې مېرمنې ۲۸ کاله عمر او درې زامن درلودل.
تر اوسه د دې ښځې د ځان وژنې اصلي لامل نه دی معلوم.
په ورته وخت یوې سرچینې د هویت پټ ساتلو سره رخشانې رسنۍ ته ویلي، دغه ځوانې مېرمنې له خپل خاوند سره اختلاف درلود.
د سرچینې په وینا، د دغې ښځې خاوند په لعل و سرجنګل ولسوالۍ کې د طالبانو د ځواکونو له خوا نیول شوی دی.
د طالبانو بیا واک ته تر رسېدو وروسته، د هېواد په یو شمېر ولایتونو کې د ښځو او نجونو د ځان وژنې پېښې زیاتې شوې دي.
دغه ډول پېښې ډېرې د طالبانو د محدویتونو، لوږې، بېکارۍ او کورني تاوتریخوالي له امله رامنځ ته کېږي.
