غزني کې د طالبانو امنیه قوماندانۍ په یوه خبرپاڼه کې ویلي، د دې ولایت «ګیرو ولسوالۍ کې د یوه لاسي بم په چاودنه کې یوې ښځې ژوند له لاسه ورکړی دی.
رخشانه: دا پېښه پرون (شنبې د لړم ۲۳ مه) مازیګر مهال د ګیرو ولسوالۍ د «شېرزاده» په کلي کې رامنځ ته شوې ده.
خبرپاڼه کې راغلي، پېښه د یوه کور د ننه رامنځ ته شوې، چې له امله یې یوه ۳۰ کلنه ښځه وژل شوې.
د خبرپاڼې له مخې دا لاسي بم د دې ښځې مېړه کور ته راوړی وو.
معلومه نه ده، چې د دې ښځې خاوند دا بم له کومه ځای او په څه ډول تر لاسه کړی وو.
هېواد کې هر کال لسګونه کسان په ځانګړې توګه ماشومان د جګړو لسیزې له پاتي شویو ناچاودو توکو د چاودنو قرباني کېږي.
اوچا څه موده وړاندې په یوه راپور کې اعلان وکړ، چې افغانستان کې د چاودېدونکو توکو د چاودنو ۷۸ سلنه قربانیان ماشومان دي.
د دې بنسټ په وینا، د ناچاودو توکو پاتې شوني لا هم په افغانستان کې ورځنۍ ګواښ ګڼل کېږي.
