په جینوا کې د افغانستان د دایمي استازولۍ سرپرست نصیر احمد فایق د طالبانو له لوري د بامیانو ولایت د پنجاب ولسوالۍ د «رشک» له کلي د ۲۵ کورنیو په زور کډه کولو په تړاو وايي، دغه اقدام د ملکیت د حقونو، اسلامي لارښوونو او ټولنیز عدالت له اصولو ښکاره سرغړونه ده.
رخشانه: ښاغلي فایق نن (چهارشنبې د زمري ۸ مه) په خپله اېکس پاڼه لیکلي«د [ طالبانو له خوا] د کوچیانو په ګټه، د بامیانو ولایت د پنجاب ولسوالۍ د اصلي اوسېدونکو په زور کډه کول او د هغوی د کورنو او ځمکو غصبول د اسلام له لارښوونو، ټولنیز عدالت له اصولو او د بشري حقونو په تړاو د نړیوالو ژمنو خلاف عمل دی.»
په جینوا کې د افغانستان د دایمي استازولی سرپرست د غور ولایت د دولت یار ولسوالۍ له څو کلیو او د بامیانو د پنجاب ولسوالۍ د رشک د کلي اوسېدونکو اجباري بې ځایه کولو ته په اشارې، دغه اقدامات ښکاره ظلم بللی او هغه یې په کلکو ټکو غندلی دی.
نوموړي ویلي، د اسلامي لارښوونو سره سم چې«مالکیت یې مشروع او تصرف یې منع کړی، هېڅ کس یا ډله ان د دولت په نوم حق نه لري، چې د خلکو کورونه او ځمکې د مشروع محکمو له پرېکړو او د هغې د معادلو بیو له ورکړې پرته په زور ونیسي او نورو ته یې ووېشي.»
فایق د هېواد له وګړو سره، په ځانګړې توګه د کوچیانو د مېشت کولو په تړاو د طالبانو توپیري چلند د عدالت څخه سرغړونه بللې وايي، د طالبانو دغه ګام د قومي درزونو د زیاتېدو، د بې باورۍ د زیاتوالي، د دښمنۍ فضا د پیاوړي کېدو او خلکو د پاشل کېدو سبب شوی دی.
هغه زیاته کړې«دا پرېکړې نه یوازې غیرقانوني او نامشروع دي، بلکې په ټولنه کې کړکېچ، بې ثباتي او شخړې زیاتوي.»
فایق د طالبانو د ویاند دې خبرو ته چې د بامیانو خلکو ته یې د سرپناه جوړولو ژمنه ورکړې وه په اشارې لیکلي، دغه ډله د محرومو خلکو کورونه او ځمکې مصادره کوي.
په جینوا کې د افغانستان د دایمي استازولۍ سرپرست طالبانو ته په خطاب کې ویلي«که د جوړلو توان نه لرۍ، لږ تر لږه د خلکو کورونه او ځمکې خو مه نیسۍ.»
په بامیانو کې سیمه ییزه سرچینو د دوشنبې په ورځ (د زمري ۶ مه) رخشانې رسنۍ ته ویلي وو، چې طالبانو د والي په امر د دغه ولایت د پنجاب ولسوالۍ د «رشک پشته غرغري» د کلي ۲۵ تنو کورونه مهر و لاک کړي او د هغو اوسېدونکي یې په زور کډه کړي دي.
د سرچینې په وینا، د طالبانو پلاوي «د سترې محکمې دوه پرېکړه لیکونه» ونه منل، ۲۵ کورونه یې مهر و لاک کړل، ښخې ماشومان او د خلکو توکي یې په زور له کورونو د باندې وایستل.
