د بشري حقونو د زغم بنسټ اعلان وکړو چې د بشري حقونو د درې نورو بنسټونو سره یې په ګډه د دایمي خلکو محکمې لاندې افغان مېرمنو لپاره لومړۍ د خلکو محکمه پیل کړې ده.
رخشانه: زغم بنسټ نن (پنشنبې د زمري ۹ مه) د یوې خبرپاڼې په خپرولو سره د افغانستان د ښځو لپاره د دغه محکمې د پیل خبر ورکړی دی.
د زغم بنسټ له خوا په خپره شوې اعلامیه کې راغلي، د ۲۰۲۱ په اګست کې د طالبانو واک ته رسېدو وروسته په افغانستان کې ښځې او نجونې د «توپيري چلند، ځپنې، زده کړو، کار، ټولنیز ګډون او بنسټیزو آزادیو د محدویت له پراخو څپو سره مخ دي.»
په اعلامیه کې ویل شوي:«دا ګام په افغانستان کې د ښځو په وړاندې د بشري حقونو د سرغړونو لپاره د معافیت سره د مبارزې او د طالبانو د ظلم او جبر د نورمال کېدو مخنیوی شمېرل کېږي.»
د بشري حقونو د زغم بنسټ وايي، د دې محکمې په پیل سره یې« د عدالت غوښتنې او جرمونو په وړاندې د طالبانو ځواب وینې لپاره یوه بله لار» پرانسته.
اعلامیه کې دا هم راغلي، یاده محکمه به د نړیوالو وکیلانو، عدالت غوښتونکو، د تاوتریخوالي شاهدانو او کارپوهانو سره په همکارۍ د روان کال د اکتوبر په لسمه نېټه د هسپانیې په مادرید کې د ښځو پر وړاندې د «طالبانو جنایتونه» وڅېړي.
د اعلامیې له مخې، یاده نړیواله محکمه به په خپلواکه توګه د جنسیت پر بنسټ د «ربړونې» چې د نړیوال قانون له مخې پیژندل شوي جرمونه دي، اسناد او لاسوندونه وارزوي.
د زغم بنسټ دغه راز ویلي، د افغان ښځو او نجونو سخته ځپنه نه یوازې د بشر د نړیوالو حقونو، بلکې د اسلامي لارښوونو سره هم په ټکر کې دي.
د خلکو دا محکمه، د نړیوالو وجداني محکمو، د ویتنام د جنګي جرمونو محکمې او د نسل وژنې قضیو له تاریخي تجربې څخه په الهام اخیستنې د «سیستماتیک تاوتریخوالي او د افغان ښځو هدفمندانه له منځه وړلو» ته د ځواب ویلو په پار جوړه شوې ده.
د خلکو یاده محکمه د بشري حقونو د ادارو (زغم، د افغانستان د بشري حقونو او ډیموکراسۍ سازمان، د څیړنې او پراختیا بنسټ، او د بشري حقونو د دفاع ټولنې) په همکارۍ ترسره کېږي.
