د افغانستان له رسنیو د ملاتړ بنسټ (AMSO) په دې وروستیو کې د طالبانو له لوري د خبریالانو او رسنیزو فعالانو نیول کېدو، ګواښلو او محدیتونو په تړاو وايي، د رسنیو سانسور او ګواښل د خلکو د حقونو تر پښو لاندې کولو په مانا دي.
رخشانه: د رسنیو د ملاتړ دې بنسټ نن (چهارشنبې د زمري ۸ مه) د یوې خبرپاڼې په خپرولو سره پر رسنیو، خبریالانو او رسنیزو فعالانو د محدیتونو زیاتېدو له امله اندېښنه څرګنده کړې ده.
د رسنیو د ملاتړ بنسټ د خبریالانو او رسنیزو فعالانو نیولو ته په اشارې ویلي«په تېره یوه میاشت کې معلوماتو ته د لاس رسي حق او بیان د آزادۍ پر وړاندې د اندېښمنوونکو پېښو شاهدان وو.»
دغه راز یاد بنسټ په سرپل کې د ژوندیو انځورونو د خپرواي مخنیوي ته اشاره کړې، ویلي یې دي«دا پرېکړه د بیان د آزادۍ د بنسټیزه اصولو او واقعیتونو د خپرولو خلاف ګڼل کېږي.»
د رسنیو د ملاتړ بنسټ په اند، دغه ډول چلندونه د بشري بنسټیزو حقونو، ملي او نړیوالو ژمنو او بیان آزادۍ د ارزښتونو سره په ټکر کې دي.
دغه رسنیز بنسټ له طالبانو غوښتي، چې نیول شوي خبریالان له ځنډ، قید او شرط پرته خوشي کړي.
د رسنیو د ملاتړ بنسټ وايي، طالبان باید د خبریالانو لپاره د خپلواکه او ډاډمنو فعالیتونو زمینه برابره او د بیان آزادۍ ته درناوی وکړي.
د افغانستان د خبریالانو مرکز دوه ورځې وړاندې لیکلي وو، طالبانو د تېرو دریو اونیو په اوږدو کې کم تر کمه اووه خبریالان او رسنیز فعالان په کابل او یوه بل ولایت کې نیولي دي.
طالبانو د تېرو څلورو کلونو په اوږدو کې په هېواد کې د رسنیو او رسنیزو فعالیتونو پر وړاندې سخت محدویتونه وضع کړي او دا د لسګونو غږیزو، تصوري او چاپي رسنیو د بندېدو لامل شوي دي.
