د افغانستان له رسنیو د ملاتړ بنسټ (AMSO) ویلي، د طالبانو امربالمعروف ځواکونو لغمان ولایت کې د یوې محلي راډیو څلور ښځینه خبریالانې او مسوول مدیر څخه پوښتنې ګروېږنې کړې او د څو ساعتونو لپاره یې نیولي وو.
رخشانه: دغه سازمان په یوه اعلامیه کې لیکلي، دا پېښه پرون (یکشنبې د لړم ۲۴ مه) له غرمې مخکې ۱۰ بجې رامنځ ته شوې ده.
امسو په خپله اعلامیه کې ویلي، دا څلور ښځینه خبریالانې د یوه راډیويي خپرونې تر ثبت مخکې، د «نارینه همکارانو د شتون» په تور نیولې دي.
دې بنسټ ویلي، د دې سیمه ییزې راډیو دا څلور ښځینه خبریالانې او مسوول مدیر د طالبانو د امربالمعروف ځواکونو له خوا نیول شوې، او بغلان کې د طالبانو امربالمعروف ریاست ته وړل شوې دي.
امسو لیکلي، د طالبانو امربالمعروف ځواکونو د یادې سیمه ییزې راډیو له څلور ښځینه خبریالانو او مسوول مدیر څخه پوښتنې کړې او هغوی یې د دریو ساعتونو لپاره نیولې او وروسته یې په ضمانت خوشې کړې دي.
د افغانستان له رسنیو د ملاتړ سازمان لغمان کې د طالبانو د امربالمعروف ځواکونو له خوا د دې ښځینه خبریالانو څخه پوښتنو کول او نیول په کلکه غندلي دي.
امسو د طالبانو دا اقدام «اندېښمنوونکی» بللی او له دې ډلې یې غوښتي، چې د خبریالانو مسلکي خپلواکۍ ته درناوی وکړي.
دې بنسټ ټینګار کړی، چې افغان ښځینه خبریالانې هم باید د کار، بیان د آزادۍ له حق، رسنیز او مسلکي فعالیت څخه برخمنې وي.







