د طالبانو د سترې محکمې له خوا د اعلان شوې خبرپاڼې پر اساس دغه ډلې د روانې اوونۍ په اوږدو کې د یوې ښځې په ګډون ۲۳ تنه په پکتیا، کابل، دایکنډي او بدخشان ولایتونو کې په عام محضر کې په دورو وهلي دي.
رخشانه: دغه کسان د «غلا، لواطت، نامشروع اړیکې، له واده بهر د جنسي اړیکې، نشه کوونکو ګولیو، شیشې، او چرسو د پېر، پلور قاچاق، او جوارګرۍ» په تور د خلکو پر وړاندې په دورو وهلي دي.
د یکشنې په ورځ (زمري ۵ مه) پکتیا ولایت کې دوه تنه د غلا په تور په عام محضر کې ۳۸ دورې و وهل شول.
دغه کسان د پکتیا ولایت څمکنیو ولسوالۍ کې د طالبانو د ابتدایه محکمې له خوا په اتو او لس میاشتو تنفذي بند باندې هم محکوم شوي دي.
د سه شنبې ورځ د (زمري ۷ مه) بیا په کابل، دایکنډي او بدخشان ولایتونو کې د یوې ښځې په ګډون اته تنه د «لواطت، نامشروع اړیکې، له واده بهر جنسي اړیکې، نشه کوونکو ګولیو، شیشې، او چرسو د پېر، پلور قاچاق، او جوارګرۍ» په تور په عام محضر کې په دورو وهل شوي دي.
د طالبانو سترې محکمې لیکلي، چې کابل کې یې دوه تنه د «لواطت» په تور ۳۹ دورې وهلي دي.
خو دا معلومه نه ده، چې یادو کسانو ته څومره موده بند اورول شوی دی.
یادې محکمې دغه راز زیاته کړې، چې دایکنډي ولایت کې یې یوه مېرمن«د نامشروع اړیکې» په تور په عام محضر کې ۳۹ دورې وهلې ده.
دا ښځه د دایکنډي ولایت د ابتدایه ښاري محکمې له خوا په یوه کال تنفذي بند هم محکومه شوې ده.
د طالبانو سترې محکمې په یوه بله اعلامیه کې لیکلي، د بدخشان ولایت په ارګو ولسوالۍ کې دوه تنه «له واده پرته جنسي اړیکې» په تور په عام محضر کې ۳۹ دورې و وهل.
معلومه نه ده، چې یادو کسانو ته څومره موده بند سزا اورول شوې ده.
دغه راز یادې محکمې لیکلي، کابل کې بیا درې تنه« د نشه کوونکو ګولیو، شیشې، او چرسو د پېر، پلوراو قاچاق» په تور، ۱۰ تر۲۰ دورې په عام محضر کې وهل شوي دي.
دا کسان د محکمې د پرېکړې پر اساس له یوه تر دوه کاله او شپږ میاشتو تنفذي بند باندې هم محکوم شوي دي.
نن پنشنبې (د زمري ۹ مه) په کابل کې ۱۳ تنه، د جوارګرۍ، د نشه يي توکو د پېر، پلور، قاچاق، هئروینو او چرسو» په تور په عام محضر کې ۱۰، ۱۵، ۲۵ او ۳۰ دورې ووهل شول.
دغو کسانو ته میر بچه کوټ ولسوالۍ کې د طالبانو د ابتدايه محکمې او د کابل د نشه يي توکو د مخنیوي د ابتدايه محکمې د پریکړې پر بنسټ د اتو او دولسو میاشتو بند سزا هم اورول شوې ده.
طالبانو د تېرې اوونۍ په اوږدو کې د دریو ښځو لس تنه په پنځو ولایتونو کې د خلکو پر وړاندې په دورو وهلي وو.
