د طالبانو له لوري د ښځو نیونې لړۍ په ترڅ کې سیمه ییزه سرچینې وايي، د دغه ډلې د امربالمعروف ځواکونو د هرات ولایت المهدي جبراییل ښارګوتي کې شپږ ځوانې نجونې او ښځې د بد حجابۍ له امله نیولې او نامعلوم ځای ته یې وړې دي.
رخشانه: د هرات جبرییل ښارګوټي کې دوه سرچینو رخشانې رسنۍ ته ویلي، طالبانو دغه شپږ ځوانې نجونې او ښځې نن (شنبې د زمري ۱۱ مه) د دولتي کلېنیک له مخې ونیولې.
د سرچینې په وینا، د طالبانو د امربالمعروف ځواکونه وسله وال وو، ښخې او ځوانې نجونې یې په زور رنجر ته پورته او له ځان سره یوړې.
یوې سرچینې د هویت نه ښودلو په شرط رخشانې رسنۍ ته ویلي، د ښځو او ځوانو نجونو نیول کېدل یې په خپلو سترګو لیدلي.
هغه زیاته کړې:«دا مهال هرات په ځانګړې توګه په المهدي جبرییل ښارګوټي کې ښځې په وېره او ډار کې ژوند کوي، هغوی کوم امنیت او حقونه نه لري.»
یوې بلې سرچینې هم د ځوانو نجونو او ښځو د نیولو پخلی وکړ رخشانې رسنۍ ته یې ویلي، د طالبانو د امربالمعروف ځواکونه کابو له لسو ورځو راپدېخوا د هزاره مېشتې سیمې څخه ښځې او نجونې نیولې او له ځان سره یې نامعلوم ځای ته وړې دي.
د سرچینې په وینا، طالبانو په تېرو لسو ورځو کې له ۱۵ تر ۲۰ پورې نجونې او ښځې د المهدي جبرییل ښارګوټي څخه نیولې دي.
تر اوسه د طالبانو له لوري د دغه نیول شویو ښځو او نجونو د وضعیت او ساتنې د ځای په اړه معلومات په لاس کې نشته.
دا په داسې حال کې ده، چې طالبانو په تېرو لسو ورځو کې لږ تر لږه ۱۴۰ نجونې او ښځې په کابل کې د بد حجابۍ په تور نیولې دي.
