د خوړو نړیوال بنسټ (WFP ) اعلان کړی، په افغانستان کې د لوږې تر ټولو زیات زیان مننوونکي کسان، ښځې، ماشومان او راستېدونکي کډوال دي.
رخشانه: دغه بنسټ نن (یکشنبې د زمري ۱۲ مه) د یوې خبرپاڼې په خپرولو سره لیکلي، افغانستان کې د لوږې ناورین ورځ تر بلې زیاتېږي.
د خوړو نړیوال بنسټ وايي، زیان مننوونکو کسانو ته د رسېدنې لپاره په راتلونکو شپږو میاشتو کې ۵۳۹ میلیون ډالرو ته بېړنۍ اړتیا ده.
یاد بنسټ زیاته کړې، افغانستان په نړۍ کې تر ټولو زیات د لوږې له ناورین سره مخ دی، په داسې توګه چې له هرو پنځو کسانو یو یې نه پوهېږي، چې د راتلونکې یوه وخت خواړه به یې له کومه ځایه مومي.
د خوړلو نړیوال بنسټ وايي، اټکل کېږي په افغانستان کې تر ۵ کلونو کم عمره ۳.۵ میلیونه ماشومانو له خوارځواکۍ سره مخ شي.
د یاد بنسټ په وینا، په روان میلادي کال کې کابو ۱.۲ میلیونه امیندواره او شیدې ورکوونکې میندې په خوراځواکۍ اخته دي، چې بېړنۍ درملنې ته اړتیا لري.
د خوړو نړیوال بنسټ ټینګار کړي، چې په افغانستان کې ښځې او نجونې په ناوړه توګه د لوږې له ناورین سره مخ دي.
