ننګرهار کې سیمه ییز طالب چارواکي د ناپېژانده وسله والو له خوا د یوې ډاکتر د قتل په تړاو ویلي، چې هغه د خپل خاوند په لارښوونه د پیسو په بدل کې وژل شوې ده.
رخشانه: ننګرهار کې د طالبانو د امنیه قوماندانۍ ویاند سید طیب حماد نن (دوشنبې د زمري ۱۳ مه) ویلي، د دغې ډاکتر خاوند یوه کس ته ۱۰۰ زره افغانۍ او ۳ زره امریکايي ډالر ورکړي، تر څو یې ښځه ورووژني.
د حماد په وینا، د پېښې په تړاو دوه تنه نیول شوي او د دلایو د روښانتیا په موخه پلټنې پیل شوې دي.
په ورته وخت د ننګرهار د امنیه قوماندانۍ په خبرپاڼه کې راغلي، دغه ښځه له خپل خاوند څخه د طلاق اخیستو په خاطر وژل شوې ده.
تېره ورځ ننګرهار کې سیمه ییزه سرچینو ویلي وو، چې یوه قابله د دې ولایت د مرکز جلال آباد ښار د اتمې ناحیې اړوند سیمه کې د ناپېژانده وسله والو کسانو په ډزو وژل شوې وه.
د سرچینې په وینا، دغه قابلې د ننګرهار په حوزوي روغتون کې کار کاوه او امنیه قوماندانۍ په لنډ واټن کې په ډزو وژل شوې وه.
سرچینې د وژل شوې ډاکتر نوم زېبا ښودلی لیکلي یې دي، چې هغه ۲۸ کلنه وه.
