ننګرهار کې سیمه ییزه سرچینې وايي، د دغه ولایت مرکز جلال آباد ښار کې یوه قابله د نامعلومه وسله والو کسانو په ډزو وژل شوې ده.
رخشانه: ننګرهار کې دوه سیمه ییزه سرچینو ویلي، دغه قابله نن (یکشنبې د زمري ۱۲ مه) سهار ۸:۰۰ بجې د جلال آباد ښار د اوومې ناحیې اړوند «الفت مینه» سیمه کې وژل شوې ده.
د سرچینې په وینا، هغه کار ځای ته روانه وه، چې د ننګرهار امنیه قوماندانۍ په ۲۰۰ مترۍ کې وژل شوې.
سرچینه وايي، دغې قابلې د ننګرهار په حوزوي روغتون کې دنده درلوده.
د یادې قابلې د کورنۍ یوه غړي ویلي، دوی له هېچا سره شخصي دوښمني نه لري.
نوموړي ویلي«هغې د سهار لمانځه وروسته قرانکریم تلاوت کړ او د کار ځای پر خوا روانه شوه.»
تر اوسه د دې قابلې هویت او عمر نه دی مشخص شوی.
هېڅ کس او یا ډلې د دې پېښې مسوولیت په غاړه نه دی اخیستی.
ننګرهار کې سیمه ییز طالب چارواکو هم تر اوسه په دې اړه څه نه دي ویلي.
