ننګرهار کې سیمه ییزه سرچینې وايي، د دې ولایت په مومند درې ولسوالۍ کې د یوې دیني مدرسې ۶۶ زده کوونکي مسموم شوي دي.
رخشانه: ننګرهار کې دوه سیمه ییزه سرچینو ویلي، دغه زده کوونکي تېره پرون (دوشنبې د زمري ۱۳ مه) د «۲۹ کانال» په سیمه کې په یوه دیني مدرسه کې مسموم شوي دي.
د سرچینې په وینا، د دیني مدرسې دغه زده کوونکي په زهري موادو ککړو خوړو، د خوړلو وروسته مسموم شوي وو.
سرچینې زیاته کړې، په دې مدرسه کې ۲۱۰ تنه په زده کړو بوخت دي او د ډاکتر له تشخیص وروسته معلومه شوې، چې دا ۶۶ تنه په خوړولو کې د ګډو شویو زهري موادو له امله مسموم شوي دي.
مسموم شوي زده کوونکي د درملنې په موخه د مومند درې، غیني خېلو او ننګرهار حوزوي روغتون ته لېږدول شوي دي.
د ننګرهار په حوزوي روغتون کې یوې سرچینې ویلي، له دې ناروغانو یو شمېر رخصت او خپلو کورونو ته تللي دي.
تر اوسه د دې شمېر زده کوونکو د روغتیايي حالت په اړه جزیات په لاس کې نشته.
په ننګرهار ولایت کې سیمه ییز طالب چارواکو د دغې پېښې په اړه معلومات نه دي تر لاسه کړي.
