کونړ کې سیمه ییزې سرچینې وايي، طالبانو په دغه ولایت کې له پوهنتون څخه د زده کړیالانو له فراعت غونډې انځور اخیستل منع کړل.
رخشانه: کونړ کې دوه سیمه ییزو سرچینو رخشانې رسنۍ ته ویلي، دا امر نن(سه شنبه د زمري ۱۴ مه) په دغه ولایت کې د امربالمعروف ریاست له خوا ورکړل شوی دی.
کونړ کې د طالبانو د امربالمعروف ریاست د امر پر بنسټ، له دې وروسته هېڅ کس حق نه لري چې له پوهنتون څخه د فارغو محصلینو د فراغت غونډې انځورونه واخلي او په خواله رسنیو کې یې خپاره کړي.
د سرچینې په وینا، د کونړ د پوهنتون ریاست تېره ورځ د محصلینو د فراغت غونډې د تشو څوکیو انځورونه په خپله فسبوک پاڼه خپاره کړي وو، خو له لږ ځنډ وروسته یې پاک کړل او یوازې د فراغت مراسمو د بنر انځور یې خپور کړ.
سرچینې زیاته کړې، له دې وروسته زده کړیالان په فراغت غونډو کې حق نه لري چې په «غربي» موډل وېښتان اصلاح کړي او یا هم د (فراغت لمانځلو ځانګړې) څلورغوږې خولۍ پر سر کړي، بلکې ټول باید ګردې خولۍ ولري.
د سرچینې د خبرو پر بنسټ، د کونړ د پوهنتون او د طالبانو د امربالمعروف ریاست د فراغت په لمانځ غونډه کې د ویښتانو اصلاح او د څلورغوږې خولۍ په سر کول د(لوېدیځ کلتور) بولي.
سرچینې زیاته کړې، د همدې محدویتونو له امله د دغه پوهنتون د اقتصاد پوهنځۍ فارغانو د فراغت غونډې مراسم د پوهنځۍ له سالون د باندې په یوه خصوصي هوټل کې تر سره کړل.
کونړ کې د طالبانو د امربالمعروف ریاست د لارښوونې پر بنسټ، د دې ولایت پوهنتون ته نوي بریالي شوي زده کړیالان حق نه لري، چې خپلې ږيرې اصلاح کړي.
د طالبانو د امربالمعروف د قانون پر اساس په رسنیو او ټولینزو شبکو کې د ساه کښو انځور خپرول حرام دي. د دې قانون له خپرېدو وروسته طالبانو په ۲۰ ولایتونو کې په رسنیو کې د ساه کښو انځور خپرول بند کړل.
