د افغانستان لپاره د ملګرو ملتونو د بشري حقونو شورا ځانګړي راپور ورکوونکي ریچارد بنټ ویلي، له پاکستان نه د افغان کډوالو په زور ایستلو د ملاتړ اړتیاوې زیاتې کړې او د بې ثباتۍ خطر له ځان سره لري.
رخشانه: ښاغلي بنټ نن (چهارشنبې د زمري ۱۵ مه) په خپله اېکس پاڼه لیکلي، زرګونه افغان وګړي سره له دې چې د ځورولو، ربړونې او تاوتریخوالي ګواښونه شتون لري، د پاکستاني دولت له لوري د جبري ایستلو سره مخ دي.
بنټ لیکلي:« دا ډول کړنې د جبري نه ستنولو له اصل څخه سرغړاوی دی.»
د کډوالو په چارو کې د ملګرو ملتونو عالي کمېشنرۍ (UNHCR) هم اعلان کړی، چې پاکستان دې د پي. او. ار کارت لرونکو افغان کډوالو د ایستلو څخه لاس واخلي.
د ملګرو ملتونو دغه بنسټ د پي. او. ار کارت لرونکو افغان کډوالو په ایستلو اندېښنه ښودلې وايي، د هغوی په زور ایستل د دې وګړو پر وړاندې د پاکستان د اوږدې مودې انساني چلند او د نه ستنولو له اصل څخه سرغړاوی دی.
د ګډوالو په چارو کې د ملګرو ملتونو عالي کمېشنرۍ ویلي، دوی هېواد ته د هغه ښځو او نجونو د ستنولو په اړه اندېښمن دي، چې د هغوی بشري حقونه (هلته) له ګواښ سره مخ دي.
یاد بنسټ د پاکستان له دولته غوښتي، چې د افغان کډوالو د پي. او. آر کارتونه د اعتبار موده وغځوي او وايي، د پاکستان دولت باید دد د هغوی غیر ارادي نه ستنولو په ګډون د دوامداره نړیوال خوندیتوب اړتیاو څخه د معافیت لپاره اقدامات وکړي.
د کډوالو په چارو کې د ملګرو ملتونو عالي کمېشنرۍ ویلي، په روان کال کې د ګاونډیو هېوادونو له خوا د افغان کډوالو په لویه کچه ستنولو په کوربه ټولنه د لومړنیو خدماتو، ځای ځایګي او معشیت برخه کې فشارونه راوستي او په افغانستان کې یې ویجاړ انساني ناورین لا بد کړی دی.
دغه بنسټ زیاته کړې، په روان میلادي کال کې له ۲.۱ میلیون څخه زیات افغان کډوال، یا په خپله خوښه او یا هم په زور خپل هېواد ته ستنېدلي، چې له دې شمېر څخه یې ۳۵۲ زره له پاکستان څخه دي.
