د طالبانو د سترې محکمې له لوري د خپرو شویو خبرپاڼه پر بنسټ، دغې ډلې روانه اوونۍ په کاپيسا، کابل، بغلان، میدان وردګ، زابل او کندوز ولایتونو کې د بېلا بېلو تورنو له امله د یوې ښځې په ګډون ۳۸ تنه په عام محضر کې په دورو وهلي دي.
رخشانه: دغه کسان د«نظام پر وړاندې د تبلیغ، نشه کوونکو ګولیو او الکولي مشروباتو د پېر، پلور او قاچاق، جعلي اسنادو، لواطت، غلا او نامشروع اړیکو» په تور په عام محضر کې په دورو وهل شوي دي.
د (زمري ۱۲ مه) د یکشنبې په ورځ اته تنه په کاپیسا او کابل کې د «نظام پر ضد تبلیغ او نشه کوونکو ګولیو د پېر، پلور او قاچاق» په تور په عام محضر کې په دورو وهل شوي دي.
یو تن په کاپيسا ولایت کې «د نظام پر ضد تبلیغ» په تور په عام محضر کې ۳۹ دورې وهل شوی دی.
دغه کس د کاپيسا د کوهستان د حصه اول ولسوالۍ د طالبانو د ابتدایه محکمې د پرېکړې پر اساس په یو کال او شپږ میاشتې تنفذي بند هم محکوم شوی دی.
په کابل ولایت کې بیا اووه تنه «د نشه کوونکو ګولیو د پېر، پلور او قاچاق» په تور له ۱۰ تر ۳۹ دورو وهل شوي دي.
دغه کسانو ته د کابل د مسکراتو او نشه يي توکو د مخینوي ابتدایه محکمې د پرېکړې پر اساس له یوه تر پنځو کلونو پورې د بند سزا هم اورول شوې ده.
د (زمري ۱۳ مه) د دوشنبې په ورځ په بغلان او میدان وردګ ولایت کې پنځه تنه د «اسنادو د جعل او لواطت» په تور په عام محضر کې په دورو وهل شوي دي.
بغلان ولایت کې دوه تنه د «اسنادو د جعل» په تور په عام محضر کې ۲۰ دورې وهل شوي دي.
دغه کسان په مرکزي بغلان ولسوالۍ کې د طالبانو د ابتدایه محکمې له خوا په شپږ میاشتې تنفذي بند هم محکوم شوي دي.
په میدان وردګ ولایت کې بیا درې تنه د «لواطت» په تور په عام محضر کې ۳۹ دورې وهل شوي دي.
دغه کسانو ته د میدان وردک ولایت د سیدآباد ولسوالۍ د طالبانو ابتدایه محکمې درې میاشتې تنفذي بند سزا هم اورولې ده.
د (زمري ۱۴ مه) د سه شنبې په ورځ ۱۰ تنه په کابل او میدان وردګ ولایتونو کې د «نشه کوونکو ګولیو د پېر، پلور، قاچاق او غلا» په تور په عام محضر کې په دورو وهل شوي دي.
له دې کسانو ۹ تنه یې په کابل کې د «نشه کوونکو ګولیو د پېر، پلور او قاچاق» په تور په دورو وهل شوي دي.
دغه کسان د کابل د مسکراتو او نشه يي توکو د مخنیوي ابتدایه محکمې د پرېکړې پر اساس یونیم کال تنفذي بند سزا هم اورول شوې ده.
یو تن بیا میدان وردګو ولایت کې د «غلا» په تور په عام محضر کې ۳۹ دورې وهل شوی دی.
معلومه ده، چې دغه کس په څومره بند محکوم شوی دی.
د (زمري ۱۴ مه) د چهارشنبې په ورځ په زابل او کابل ولایتونو کې د یوې ښځې په ګډون ۱۴ تنه د «غلا، لواطت، نامشروع اړیکو او نشه کوونکو ګولیو د پېر، پلور او قاچاق» په تور په دورو وهل شوي دي.
په زابل ولایت کې د یوې ښځې په ګډون اووه تنه د «غلا، لواطت او نامشروع اړیکو» په تور په عام محضر کې له ۲۰ تر ۳۰ دورې وهل شوي دي.
معلومه نه ده، چې دغه کسانو ته د بند څومره سزا اورول شوې ده.
کابل ولایت کې بیا اووه تنه «د نشه کوونکو ګولیو او الکولي مشروباتو د پېر، پلور او قاچاق» په تور له ۱۰ تر ۳۹ دورو وهل شوي دي.
دغه کسانو ته د کابل د مسکراتو او نشه يي توکو د مخنیوي ابتدایه محکمې د پرېکړې پر اساس له یوه تر دریو کلو تنفذي بند سزا هم اورول شوې ده.
د (زمري ۱۶ مه) د پنشنبې په ورځ بیا کندوز ولایت کې یو تن د «غلا» په تور په عام محضر کې ۳۹ دورې و وهل شو.
دغه کس ته د دې ولایت د کلباد ولسوالۍ د طالبانو د ابتدایه محکمې د پرېکړې پر اساس درې میاشتې تنفذي بند سزا هم اورول شوې ده.
