دایکنډي کې سیمه ییزې «نسیم» راډیو اعلان کړی چې طالبانو یو ځل بیا د دغه سیمه ییزې شبکې مسوول مدیر سلطان علي جوادي او دوه خبریالان سیف الله رضايي او مجتبی قاسمي نیولي دي.
رخشانه: نسیم راډیو پورې اړوند فسبوک پاڼې د یوه پوسټ په خپرولو سره لیکلي، هغوی نن (چهارشنبې د زمري ۱۵ مه) له ماسپښین وروسته د طالبانو د استخباراتو له لوري د دایکنډي ولایت مرکز نیلي ښار کې نیول شوي دي.
تر اوسه پورې د طالبانو د استخباراتو له لوري په دایکندي کې د دغه دریو خبریالانو د نیولو دلیل معلوم نه دی.
په دایکنډي کې د طالبانو استخباراتو د دغه درې تنو خبریالانو د نیولو تر څنګ د نسیم راډیو نشراتي کمپيوټر هم له ځان سره وړی دی.
دغه درې سیمه ییز خبریالان د ۱۴۰۲ کال په اوړي کې هم د طالبانو د استخباراتو له لوري په دایکنډي کې نیول شوي او کاري وسایل یې ترې اخیستي وو.
د نسیم راډیو مسوول مدیر له بهرنیو رسنیو سره د همکارۍ په تور دایکنډي کې د طالبانو د ښاري محکمې له خوا په یوه کال بند محکوم شوی وو او د دغه غږیزې راډیو خپرونې کابو پنخه میاشتې بندې وې.
د نسیم سیمه ییزه راډیو په بامیانو او دایکنډي ولایتونو کې خپرونې لري.
طالبانو په تېره میاشت کې کم تر کمه ۷ خبریالان او رسنیز کارکوونکي په کابل او یوه بل ولایت کې نیولي دي.
دغه ډلې په هېواد کې د خپلې څلورکلنې واکمنۍ په دوران کې پر رسنیو او رسنیزو فعالیتونو خورا سخت محدویتونه لګولي دي.
د دغه محدویتونو پلي کېدو له امله په هېواد کې ګڼ شمېر خبریالان اړ شوي، چې رسنیو کې کار پرېږدي او دغه راز لسګونه غږیزې، تصویري او چاپي رسنۍ هم بندې شوې دي.
