له ایران او پاکستان نه د افغان کډوالو د ایستلو څپې له زیاتېدو سره د ملګرو ملتونو د ښځو څانګې په یوه راپور کې اعلان کړی، چې ښځې او نجونې د لوږې، کم عمره ودونو، ځورونې او ربړونې له ګواښ سره مخ دي.
رخشانه: د ملګرو ملتونو د ښځو څانګې په تازه خپاره کړي راپور کې ویلي، له ایران او پاکستان نه ایستل شوې افغان مېرمنې او نجونې بېړنیو بشري مرستو او اوږد مهاله ملاتړ ته اړتیا لري.
په راپور کې راغلي، د ۲۰۲۳ له سپټامبر څخه تر اوسه پورې له ۲.۴۳ میلیونه څخه زیات افغان وګړي په زور له ایران او پاکستان څخه خپل هېواد ته شړل شوي، چې ښځې او نجونې یې یو په درېیمه برخه جوړوي.
یاد بنسټ ویلي، زیاتره وکړي هغه هېواد ته ګرځول کېږي، چې هلته عاید او کور نه لري او دغه راز، زده کړو او روغتیايي خدماتو ته هم لاس رسی نه لري.
د افغانستان لپاره د ملګرو ملتونو د ښځو ځانګړې استازې سوزان فرګوسن، د ښخو او نجونو پر وړاندې د طالبانو پراخو محدویتونو ته په اشارې وايي، هغوی هېواد ته له ستنېدو وروسته د لا زیات ګواښ سره مخ کېږي.
فرګوسن زیاته کړې:«یوازې لس سلنه هغه کورنۍ، چې ښځې یې سرپرستي کوي په دایمي سرپناه کې ژوند کوي، او له هرو لسو یې څلور تنه د ایستلو وېره لري.»
د افغانستان لپاره د ملګرو ملتونو د ښځو ځانګړې استازې ټینګار کړی، چې د کورنۍ سرپرسته او مجرده ښځې د طالبانو د محدویتونو له امله د بشري مرستو تر لاسه کولو په برخه کې له خنډونو سره مخ دي.
دغه بنسټ له ایران او پاکستان څخه د افغان کډوالو پراخه ایستنې ته په اشارې وايي، بشرخواخوږي بنسټونه په پولو کې حیران پاتې دي او ان نه شي کولی د هغوی لومړنۍ اړتیاوې پوره کړي.
د ملګرو ملتونو د ښځو څانګې له بنسټونو او نړیوالۍ ټولنې غوښتي، چې په بېړنۍ توګه د افغان کډوالو وصعیت ته رسېدنه او په ځانګړې توګه د ایران او پاکستان څخه د ایستل شویو ښځو او نجونو د حقونو د دفاع لپاره ګام پورته کړي.
